ਬਰਨਾਲਾ, 1 ਸਤੰਬਰ (ਰਵਿੰਦਰ ਸ਼ਰਮਾ) : ਸੂਬੇ ਭਰ ’ਚ ਜਿੱਥੇ ਭਾਰੀ ਮੀਂਹ ਦੇ ਚੱਲਦਿਆਂ ਹੜ੍ਹ ਆਉਣ ਕਾਰਨ ਹਾਲਾਤ ਕਾਫ਼ੀ ਜ਼ਿਆਦਾ ਗੰਭੀਰ ਹੋ ਚੁੱਕੇ ਹਨ ਤੇ ਭਾਰੀ ਨੁਕਸਾਨ ਹੋ ਰਿਹਾ ਹੈ, ਉੱਥੇ ਹੀ ਬਰਨਾਲਾ ’ਚ ਵੀ ਭਾਰੀ ਮੀਂਹ ਕਾਰਨ ਨੁਕਸਾਨ ਲਗਾਤਾਰ ਵੱਧਦਾ ਜਾ ਰਿਹਾ ਹੈ। ਜਿੱਥੇ ਬੀਤੇ ਦਿਨੀਂ ਮੀਂਹ ਕਾਰਨ ਗਰੀਬ ਪਰਿਵਾਰ ਦੇ ਘਰ ਦੀ ਛੱਤ ਡਿੱਗੀ ਸੀ, ਉੱਥੇ ਹੀ ਅੱਜ ਫ਼ਿਰ ਤੋਂ ਸਥਾਨਕ ਸ਼ਿਵ ਮੱਠ ਦੀ ਬੈਕਸਾਈਡ ਇਕ ਘਰ ਦੀ ਛੱਤ ਡਿੱਗ ਗਈ, ਜਿਸ ਕਾਰਨ ਗਰੀਬ ਪਰਿਵਾਰ ਦਾ ਕਾਫ਼ੀ ਨੁਕਸਾਨ ਹੋਇਆ ਤੇ ਇਕ ਵਿਅਕਤੀ ਗੰਭੀਰ ਜਖ਼ਮੀ ਵੀ ਹੋ ਗਿਆ। ਇਸ ਸਬੰਧੀ ਹੋਰ ਜਾਣਕਾਰੀ ਦਿੰਦਿਆਂ ਬਲੌਰ ਸਿੰਘ ਨੇ ਦੱਸਿਆ ਕਿ ਬੀਤੇ ਕਈ ਦਿਨਾਂ ਤੋਂ ਲਗਾਤਾਰ ਹੋ ਰਹੀ ਬਾਰਿਸ਼ ਕਾਰਨ ਘਰ ਦੀ ਛੱਤ ਲਗਾਤਾਰ ਚੌ ਰਹੀ ਸੀ। ਪਰ ਅੱਜ ਸਵੇਰੇ ਜਦੋਂ ਬਾਰਿਸ਼ ਆਈ ਤਾਂ ਛੱਤ ਹੋਰ ਜ਼ਿਆਦਾ ਚੌਣ ਲੱਗੀ। ਜਿਸ ਕਾਰਨ ਮੇਰੇ ਪਰਿਵਾਰਿਕ ਮੈਂਬਰ ਜਲਦੀ ਜਲਦੀ ਕਮਰੇ ’ਚੋਂ ਸਮਾਨ ਬਾਹਰ ਕੱਢਣ ਲੱਗੇ। ਪਰ ਇੰਨੇ ’ਚ ਹੀ ਛੱਤ ਡਿੱਗ ਗਈ। ਜਿਸ ਕਾਰਨ ਮੇਰਾ ਛੋਟੇ ਭਰਾ ਉਸ ਹੇਠ ਆ ਗਿਆ ਤੇ ਗੰਭੀਰ ਜਖ਼ਮੀ ਹੋ ਗਿਆ। ਜਿਸਨੂੰ ਤੁਰੰਤ ਬਾਹਰ ਕੱਢਕੇ ਸਿਵਲ ਹਸਪਤਾਲ ਬਰਨਾਲਾ ਦੀ ਐਂਮਰਜੈਂਸੀ ’ਚ ਲਿਜਾਇਆ ਗਿਆ, ਜਿੱਥੇ ਉਸ ਦਾ ਇਲਾਜ਼ ਚੱਲ ਰਿਹਾ ਹੈ।
ਉਨ੍ਹਾਂ ਦੱਸਿਆ ਕਿ ਉਹ ਆਪਣੇ ਘਰ ਦੇ ਸਮਾਨ ਨੂੰ ਵੀ ਕਿਸੇ ਜਾਣਕਾਰ ਦੇ ਘਰ ਸ਼ਿਫ਼ਟ ਕਰਕੇ ਔਖੇ ਸੌਖੇ ਉੱਥੇ ਗੁਜ਼ਾਰਾ ਕਰਨਗੇ। ਬਲੌਰ ਸਿੰਘ ਨੇ ਦੱਸਿਆ ਕਿ ਅਸੀਂ 300 ਰੁਪਏ ਦਿਹਾੜੀ ’ਤੇ ਕਿਰਾਏ ’ਤੇ ਲੈ ਕੇ ਈ ਰਿਕਸ਼ਾ ਚਲਾ ਕੇ ਘਰ ਦਾ ਗੁਜ਼ਾਰਾ ਕਰਦੇ ਹਾਂ। ਜਿਸ ਕਾਰਨ ਅਸੀਂ ਆਪਣੇ ਘਰ ਦੇ ਮਾੜੇ ਹਾਲਾਤ ਬਦਲਣ ਤੋਂ ਅਸਮਰਥ ਹਾਂ। ਉਨ੍ਹਾਂ ਮੰਗ ਕੀਤੀ ਕਿ ਪੰਜਾਬ ਸਰਕਾਰ ਤੇ ਜ਼ਿਲ੍ਹਾ ਪ੍ਰਸ਼ਾਸਨ ਸਾਡੀ ਮਦਦ ਕਰੇ।
