ਪੰਜਾਬ ਭਰ ’ਚ ਸਿਰਫ਼ 212 ਟਰੈਵਲ ਏਜੰਟ ਹੀ ਰਜਿਸਟਰਡ, 8 ਜ਼ਿਲ੍ਹਿਆਂ ’ਚ ਨਹੀਂ ਹੈ ਕੋਈ ਲਾਇਸੈਂਸ

ਪੰਜਾਬ, 11 ਫ਼ਰਵਰੀ (ਰਵਿੰਦਰ ਸ਼ਰਮਾ) : ਪੂਰੇ ਪੰਜਾਬ ’ਚ ਸਿਰਫ਼ 212 ਹੀ ਅਜਿਹੇ ਟ੍ਰੈਵਲ ਏਜੰਟ ਹਨ, ਜਿੰਨ੍ਹਾਂ ਕੋਲ ਵੈਧ ਲਾਇਸੈਂਸ ਹੈ, ਜਦਕਿ 92 ਫ਼ੀਸਦੀ ਅਜਿਹੇ ਟ੍ਰੈਵਲ ਏਜੰਟ ਹਨ, ਜੋ ਨਾਜਾਇਜ਼ ਤੌਰ ’ਤੇ ਕੰਮ ਕਰ ਰਹੇ ਹਨ ਭਾਵ ਸਿਰਫ਼ 8 ਫ਼ੀਸਦੀ ਏਜੰਟ ਹੀ ਕੇਂਦਰੀ ਨਿਯਮਾਂ ਅਨੁਸਾਰ ਕੰਮ ਕਰ ਰਹੇ ਹਨ। ਇਹ ਖ਼ੁਲਾਸਾ ਕੇਂਦਰ ਸਰਕਾਰ ਦੇ ਵਿਦੇਸ਼ ਮੰਤਰਾਲੇ ਦੀ ਇੱਕ ਰਿਪੋਰਟ ’ਚ ਹੋਇਆ ਹੈ। ਇਸ ਤੋਂ ਇਹ ਸਹਿਜੇ ਹੀ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਕਿ ਸੂਬੇ ਭਰ ’ਚ ਵੱਡੇ ਪੱਧਰ ’ਤੇ ਟ੍ਰੈਵਲ ਏਜੰਟ ਨਾਜਾਇਜ਼ ਤੌਰ ’ਤੇ ਕੰਮ ਕਰ ਰਹੇ ਹਨ ਤੇ ਧੋਖਾਧੜੀ ਦੀਆਂ ਸੰਭਾਵਨਾਵਾਂ ਤੋਂ ਵੀ ਇਨਕਾਰ ਨਹੀਂ ਕੀਤਾ ਜਾ ਸਕਦਾ। ਸੂਬੇ ਦੇ 8 ਜ਼ਿਲ੍ਹਿਆਂ ’ਚ ਚੱਲ ਰਹੇ ਇਮੀਗ੍ਰੇਸ਼ਨ ਦਫ਼ਤਰਾਂ ’ਚੋਂ ਕਿਸੇ ਕੋਲ ਵੀ ਲਾਇਸੈਂਸ ਨਹੀਂ ਹੈ। ਜੋ 212 ਵੈਧ ਲਾਇਸੈਂਸ ਹਨ, ਉਨ੍ਹਾਂ ’ਚੋਂ ਵੀ ਕਰੀਬ 65 ਦੇ ਲਾਇਸੈਂਸਾਂ ਦੀ ਮਿਆਦ ਖ਼ਤਮ ਹੋ ਚੁੱਕੀ ਹੈ। ਜਿੰਨ੍ਹਾਂ ਨੂੰ ਕੇਂਦਰ ਸਰਕਾਰ ਨੇ ਆਪਣੇ ਪੱਧਰ ‘ਤੇ ਰੱਦ ਕਰ ਵੀ ਕਰ ਦਿੱਤਾ ਹੈ। 

– ਕੇਂਦਰ ਸਰਕਾਰ ਵੀ ਕਾਰਵਾਈ ਲਈ ਤਿਆਰ

ਕੇਂਦਰ ਸਰਕਾਰ ਗੁਜਰਾਤ, ਪੰਜਾਬ, ਚੰਡੀਗੜ੍ਹ ਤੇ ਦਿੱਲੀ ਦੇ ਕਈ ਫਰਜ਼ੀ ਟ੍ਰੈਵਲ ਏਜੰਟਾਂ ਦੇ ਖ਼ਿਲਾਫ਼ ਕਾਰਵਾਈ ਕਰਨ ਦੀ ਤਿਆਰੀ ਵਿੱਚ ਹੈ। ਪੰਜਾਬ ਦੇ ਅੱਠ ਜ਼ਿਲ੍ਹੇ ਸ਼੍ਰੀ ਮੁਕਤਸਰ ਸਾਹਿਬ, ਤਰਨ ਤਾਰਨ, ਫਰੀਦਕੋਟ, ਪਠਾਨਕੋਟ, ਫਿਰੋਜ਼ਪੁਰ, ਮਲੇਰਕੋਟਲਾ, ਫਾਜ਼ਿਲਕਾ ਤੇ ਮਾਨਸਾ ਅਜਿਹੇ ਹਨ, ਜਿਨ੍ਹਾਂ ਦਾ ਇੱਕ ਵੀ ਟ੍ਰੈਵਲ ਏਜੰਟ ਕੇਂਦਰ ਦੀ ਲਿਸਟ ’ਚ ਰਜਿਸਟਰ ਨਹੀਂ ਹੈ। ਇਨ੍ਹਾਂ ਜ਼ਿਲ੍ਹਿਆਂ ਦੇ ਕੁੱਲ 2730 ਫਰਜ਼ੀ ਟ੍ਰੈਵਲ ਏਜੰਟਾਂ ਨੂੰ ਕੇਂਦਰ ਨੇ ਲਿਸਟ ਆਉਟ ਕੀਤਾ ਹੈ। ਜਿਨ੍ਹਾਂ ਦੇ ਖਿਲਾਫ ਕੇਂਦਰੀ ਜਾਂਚ ਏਜੰਸੀਆਂ ਕਾਰਵਾਈ ਦੀ ਤਿਆਰੀ ’ਚ ਹਨ। ਕੁਝ ਮੀਡੀਆ ਰਿਪੋਰਟਾਂ ’ਚ ਇਸ ਦਾ ਦਾਅਵਾ ਕੀਤਾ ਗਿਆ ਹੈ। ਕੇਂਦਰ ਸਰਕਾਰ ਦੁਆਰਾ ਅਮਰੀਕਾ ਤੋਂ ਡਿਪੋਰਟ ਕੀਤੇ ਗਏ 104 ਭਾਰਤੀਆਂ ਦੀਆਂ ਫਾਈਲਾਂ ਦੇ ਆਧਾਰ ’ਤੇ ਵੀ ਅਲੱਗ ਤੋਂ ਕਾਰਵਾਈ ਕੀਤੀ ਜਾਵੇਗੀ।

– ਸਭ ਤੋਂ ਜ਼ਿਆਦਾ ਲਾਇਸੈਂਸ ਜਲੰਧਰ ਦੇ ਏਜੰਟਾਂ ਕੋਲ ਪੰਜੀਕ੍ਰਿਤ
ਕੇਂਦਰ ਸਰਕਾਰੀ ਰਿਪੋਰਟ ’ਚ ਦਾਅਵਾ ਕੀਤਾ ਗਿਆ ਹੈ ਕਿ ਰਾਜ ਦਾ ਸਭ ਤੋਂ ਵੱਡਾ ਵੈਧ ਟ੍ਰੈਵਲ ਏਜੰਟਾਂ ਦਾ ਕੰਮ ਜਲੰਧਰ ’ਚ ਕੀਤਾ ਜਾਂਦਾ ਹੈ। ਜਲੰਧਰ ਤੋਂ ਬਾਅਦ ਮੋਹਾਲੀ ਤੇ ਫਿਰ ਹੁਸ਼ਿਆਰਪੁਰ ’ਚ ਸਭ ਤੋਂ ਜ਼ਿਆਦਾ ਟ੍ਰੈਵਲ ਏਜੰਟ ਰਜਿਸਟਰਡ ਹਨ। ਜਲੰਧਰ ’ਚ ਕੁੱਲ 86 ਲਾਇਸੈਂਸ ਧਾਰਕ ਟ੍ਰੈਵਲ ਏਜੰਟ ਹਨ। ਜਿਨ੍ਹਾਂ ’ਚੋਂ 16 ਦੇ ਲਾਇਸੈਂਸ ਦੀ ਮਿਆਦ ਖਤਮ ਹੋ ਚੁੱਕੀ ਹੈ। ਜਿਨ੍ਹਾਂ ਦੇ ਲਾਇਸੈਂਸਾਂ ਦਾ ਨਵੀਨੀਕਰਨ ਹੋਣ ਵਾਲਾ ਹੈ। ਨਾਲ ਹੀ ਚਾਰ ਲਾਇਸੈਂਸ ਰੱਦ ਵੀ ਕੀਤੇ ਗਏ ਹਨ। ਦੂਜੇ ਨੰਬਰ ‘ਤੇ ਮੋਹਾਲੀ ’ਚ ਸਭ ਤੋਂ ਜ਼ਿਆਦਾ ਟ੍ਰੈਵਲ ਏਜੰਟਾਂ ਕੋਲ ਲਾਇਸੈਂਸ ਹਨ। ਮੋਹਾਲੀ ਦੇ ਕੁੱਲ 31 ਟ੍ਰੈਵਲ ਏਜੰਟ ਕੇਂਦਰ ਕੋਲ ਰਜਿਸਟਰਡ ਹਨ। ਉਸ ਤੋਂ ਬਾਅਦ ਹੁਸ਼ਿਆਰਪੁਰ ’ਚ 22, ਲੁਧਿਆਣਾ ’ਚ 20 ਤੇ ਹੋਰ ਸਥਾਨਾਂ ’ਤੇ ਬਾਕੀ ਦੇ ਲਾਇਸੈਂਸ ਰਜਿਸਟਰਡ ਹਨ। ਫਤਹਿਗੜ੍ਹ ਸਾਹਿਬ ’ਚ ਇੱਕ ਏਜੰਟ (ਲਾਇਸੈਂਸ ਨਿਲੰਬਿਤ), 2 ਸੰਗਰੂਰ (ਇੱਕ ਦਾ ਲਾਇਸੈਂਸ ਰੱਦ), ਸ਼ਹੀਦ ਭਗਤ ਸਿੰਘ ਨਗਰ ’ਚ 3 (ਇੱਕ ਦਾ ਲਾਇਸੈਂਸ ਖਤਮ), ਮੋਗਾ ਜ਼ਿਲ੍ਹੇ ’ਚ 2 (ਇੱਕ ਦਾ ਲਾਇਸੈਂਸ ਖਤਮ), ਕਪੂਰਥਲਾ ’ਚ ਸਿਰਫ਼ 3 ਤੇ ਪਟਿਆਲਾ ’ਚ ਇੱਕ ਪੰਜੀਕ੍ਰਿਤ ਅਤੇ ਬਠਿੰਡਾ ’ਚ ਦੋ ਏਜੰਟ ਪੰਜੀਕ੍ਰਿਤ (ਦੋਵਾਂ ਦੇ ਲਾਇਸੈਂਸ ਖਤਮ) ਹਨ।