ਕਿਰਾਏ ਦੇ ਘਰ ’ਚ ਚੱਲ ਰਿਹਾ ਸੀ ਦੇਹ ਵਪਾਰ, ਇਤਰਾਜ਼ਯੋਗ ਹਾਲਤ ’ਚ 2 ਔਰਤਾਂ ਸਣੇ 4 ਕਾਬੂ

ਫਗਵਾੜਾ : ਪੰਜਾਬ ਦੇ ਕਪੂਰਥਲਾ ਜ਼ਿਲ੍ਹੇ ਦੇ ਸਤਨਾਮਪੁਰਾ ਥਾਣੇ ਨੇ ਦੇਹ ਵਪਾਰ ਦੇ ਦੋਸ਼ ਵਿੱਚ ਦੋ ਔਰਤਾਂ ਸਮੇਤ ਚਾਰ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਨੇ ਮੁਲਜ਼ਮਾਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ। ਸਤਨਾਮਪੁਰਾ ਥਾਣੇ ਦੇ ਇੰਸਪੈਕਟਰ ਹਰਦੀਪ ਸਿੰਘ ਨੇ ਦੱਸਿਆ ਕਿ ਉਹ ਪੁਲਿਸ ਟੀਮ ਨਾਲ ਗਸ਼ਤ ਕਰ ਰਹੇ ਸਨ। ਜਾਣਕਾਰੀ ਮਿਲੀ ਕਿ ਪਿੰਡ ਨੰਗਲ ਵਿੱਚ ਇੱਕ ਔਰਤ ਕਿਰਾਏ ’ਤੇ ਰਹਿੰਦੀ ਹੈ। ਇਸ ਸਮੇਂ ਘਰ ਦੇ ਅੰਦਰ ਦੋ ਨੌਜਵਾਨ ਅਤੇ ਇੱਕ ਹੋਰ ਔਰਤ ਮੌਜੂਦ ਹਨ। ਪੁਲਿਸ ਨੇ ਉਕਤ ਘਰ ’ਤੇ ਛਾਪਾ ਮਾਰਿਆ ਅਤੇ ਇਤਰਾਜ਼ਯੋਗ ਹਾਲਤ ’ਚ ਦੋ ਔਰਤਾਂ ਸਮੇਤ ਚਾਰ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ। ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮਾਂ ਦੀ ਪਛਾਣ ਕਰਨਪ੍ਰੀਤ ਸਿੰਘ ਵਾਸੀ ਰਾਜਾ ਗਾਰਡਨ ਕਲੋਨੀ ਸਤਨਾਮਪੁਰਾ, ਰਵਨੀਤ ਸਿੰਘ ਵਾਸੀ ਹਦੀਆਬਾਦ ਅਤੇ ਦੋ ਹੋਰ ਔਰਤਾਂ ਵਜੋਂ ਹੋਈ ਹੈ। ਉਕਤ ਘਰ ਤੋਂ 1360 ਰੁਪਏ ਵੀ ਬਰਾਮਦ ਕੀਤੇ ਗਏ।