20 ਫਰਜ਼ੀ ਫਰਮਾਂ ਬਣਾ ਕੇ ਕੀਤਾ 157 ਕਰੋੜ ਰੁਪਏ ਦਾ GST ਘੁਟਾਲਾ

ਲੁਧਿਆਣਾ, 2 ਜੁਲਾਈ (ਰਵਿੰਦਰ ਸ਼ਰਮਾ) : ਪੰਜਾਬ ਸਰਕਾਰ ਦੇ ਵਿੱਤ ਵਿਭਾਗ ਨੇ 20 ਫਰਮਾਂ ਨੂੰ ਫੜਿਆ ਹੈ, ਜੋ 866 ਕਰੋੜ ਰੁਪਏ ਦੀ ਜੀਐਸਟੀ ਚੋਰੀ ਵਿੱਚ ਸ਼ਾਮਲ ਸਨ, ਜਿਸ ਵਿੱਚ 157.22 ਕਰੋੜ ਰੁਪਏ ਦਾ ਟੈਕਸ ਸ਼ਾਮਲ ਹੈ। ਇਹਨਾਂ ਫਰਮਾਂ ਨੇ ਚਲਾਕੀ ਨਾਲ ਆਮ ਮਜ਼ਦੂਰਾਂ ਅਤੇ ਬੇਰੁਜ਼ਗਾਰ ਲੋਕਾਂ ਨੂੰ ਨਿਸ਼ਾਨਾ ਬਣਾਇਆ, ਜਿਨ੍ਹਾਂ ਨੂੰ 800 ਰੁਪਏ ਤੱਕ ਦੀ ਰੋਜ਼ਾਨਾ ਮਜ਼ਦੂਰੀ ਦਾ ਲਾਲਚ ਦਿੱਤਾ ਗਿਆ।
ਇਕ ਮੀਡੀਆ ਰਿਪੋਰਟ ਮੁਤਾਬਕ ਭੁਗਤਾਨ ਦੇ ਬਹਾਨੇ, ਉਨ੍ਹਾਂ ਦੇ ਪੈਨ ਅਤੇ ਆਧਾਰ ਕਾਰਡ ਸਮੇਤ ਦਸਤਾਵੇਜ਼ ਲੈ ਕੇ ਜੀਐਸਟੀ ਰਜਿਸਟ੍ਰੇਸ਼ਨ ਕੀਤੀ ਗਈ। ਇਹਨਾਂ ਫਰਮਾਂ ਦੇ ਖਾਤੇ ਪਹਿਲਾਂ ਹੀ ਖੁੱਲ੍ਹੇ ਹੋਏ ਸਨ, ਜਿਸ ਨਾਲ ਧੋਖਾਧੜੀ ਨੂੰ ਅੰਜਾਮ ਦਿੱਤਾ ਗਿਆ। ਵਿੱਤ ਮੰਤਰੀ ਹਰਪਾਲ ਚੀਮਾ ਨੇ ਦੱਸਿਆ ਕਿ ਇਸ ਮਾਮਲੇ ਵਿੱਚ 40 ਲੱਖ ਰੁਪਏ ਦੀ ਕਰੰਸੀ, ਜਾਅਲੀ ਬਿੱਲ ਬੁੱਕ ਅਤੇ ਬਿਨਾਂ ਦਸਤਖਤ ਵਾਲੀਆਂ ਚੈੱਕ ਬੁੱਕਾਂ ਸਮੇਤ ਕਈ ਸਬੂਤ ਇਕੱਠੇ ਕੀਤੇ ਗਏ ਹਨ।
ਮੁੱਖ ਦੋਸ਼ੀ ਸਰਬਜੀਤ ਸਿੰਘ ਦੀ ਗ੍ਰਿਫਤਾਰੀ ਲਈ ਕਾਰਵਾਈ ਜਾਰੀ ਹੈ। ਇਸ ਘੁਟਾਲੇ ਵਿੱਚ ਲੁਧਿਆਣਾ ਦੇ ਇੱਕ ਲੇਖਾਕਾਰ ਦੀ ਅਹਿਮ ਭੂਮਿਕਾ ਸਾਹਮਣੇ ਆਈ ਹੈ, ਜਿਸ ਨੇ 2023 ਵਿੱਚ ਇਹ ਗੋਰਖਧੰਦਾ ਸ਼ੁਰੂ ਕੀਤਾ। ਉਸ ਨੇ ਜਾਅਲੀ ਬਿੱਲਾਂ ਰਾਹੀਂ 2023-24 ਵਿੱਚ 249 ਕਰੋੜ ਰੁਪਏ ਦਾ ਲੈਣ-ਦੇਣ ਦਿਖਾਇਆ ਅਤੇ 104.08 ਕਰੋੜ ਰੁਪਏ ਦੀ ਇਨਪੁਟ ਟੈਕਸ ਕ੍ਰੈਡਿਟ (ਆਈਟੀਸੀ) ਦਾ ਦਾਅਵਾ ਕੀਤਾ। 2024-25 ਦੇ ਪਹਿਲੇ ਦੋ ਮਹੀਨਿਆਂ ਵਿੱਚ 47.25 ਕਰੋੜ ਰੁਪਏ ਦੇ ਲੈਣ-ਦੇਣ ਨਾਲ 8.01 ਕਰੋੜ ਰੁਪਏ ਦੀ ਆਈਟੀਸੀ ਦਾਅਵਾ ਕੀਤਾ ਗਿਆ।
ਇਸ ਤੋਂ ਇਲਾਵਾ, ਮਾਂ ਦੁਰਗਾ ਰੋਡ ਲਾਈਨਜ਼ ਨਾਮਕ ਟਰਾਂਸਪੋਰਟ ਕੰਪਨੀ ਨੇ 168 ਜਾਅਲੀ ਈ-ਵੇਅ ਬਿੱਲ ਬਣਾ ਕੇ ਧੋਖਾਧੜੀ ਕੀਤੀ। ਇਹਨਾਂ ਬਿੱਲਾਂ ਵਿੱਚ ਲੁਧਿਆਣਾ ਤੋਂ ਦਿੱਲੀ ਸਾਮਾਨ ਦੀ ਆਵਾਜਾਈ ਦਿਖਾਈ ਗਈ, ਜਦਕਿ ਅਸਲ ਵਿੱਚ ਕੋਈ ਵਾਹਨ ਪੰਜਾਬ ਵਿੱਚ ਦਾਖਲ ਨਹੀਂ ਹੋਇਆ। ਲੁਧਿਆਣਾ ਵਿੱਚ ਕੇਸ ਦਰਜ ਕੀਤਾ ਗਿਆ ਹੈ ਅਤੇ ਹੋਰ ਸ਼ੱਕੀ ਵਿਅਕਤੀਆਂ ’ਤੇ ਨਜ਼ਰ ਰੱਖੀ ਜਾ ਰਹੀ ਹੈ।