ਬਰਨਾਲਾ ’ਚ ਔਰਤ ਦਾ ਪਰਸ ਖੋਹਣ ਵਿੱਚ ਨਾਕਾਮ ਰਹਿਣ ‘ਤੇ ਬਦਮਾਸ਼ ਨੇ ਬੱਚੇ ’ਤੇ ਤਾਣਿਆ ਚਾਕੂ

– ਕੋਲੋਂ ਲੰਘ ਰਹੀ ਪੀਆਰਟੀਸੀ ਬੱਸ ਦੇ ਡਰਾਈਵਰ ਨੇ ਫੇਟ ਮਾਰ ਕੇ ਲੁਟੇਰੇ ਨੂੰ ਸੁੱਟਿਆ, ਕੀਤੀ ਜੰਮ ਕੇ ਛਿੱਤਰ ਪਰੇਡ
ਲੁਟੇਰਾ ਪਿੰਡ ਕੈਰੇ ਦਾ ਰਹਿਣ ਵਾਲਾ, ਲੋਕਾਂ ਨੇ ਪੁਲਿਸ ਹਵਾਲੇ ਕੀਤਾ ਮੁਲਜ਼ਮ
ਬਰਨਾਲਾ, 8 ਜੁਲਾਈ (ਰਵਿੰਦਰ ਸ਼ਰਮਾ) : ਜ਼ਿਲ੍ਹੇ ਵਿੱਚ ਲੁੱਟ-ਖੋਹ, ਚੋਰੀ ਦੀਆਂ ਵਾਰਦਾਤਾਂ ਲਗਾਤਾਰ ਵਧਦੀਆਂ ਜਾ ਰਹੀਆਂ ਹਨ ਪਰ ਪੁਲਿਸ ਚੋਰਾਂ ‘ਤੇ ਨਕੇਲ ਨਹੀਂ ਕੱਸ ਪਾ ਰਹੀ। ਤਾਜ਼ਾ ਮਾਮਲੇ ਵਿੱਚ ਅੱਜ ਬਾਜ਼ਾਖਾਨਾ ਰੋਡ ‘ਤੇ ਇੱਕ ਔਰਤ ਆਪਣੇ ਬੱਚੇ ਨਾਲ ਜਾ ਰਹੀ ਸੀ। ਇਸ ਦੌਰਾਨ ਲੁੱਟ ਦੀ ਨੀਅਤ ਨਾਲ ਐਕਟਿਵਾ ਸਵਾਰ ਨੌਜਵਾਨ ਔਰਤ ਦਾ ਪਿੱਛਾ ਕਰਨ ਲੱਗਾ। ਮੌਕਾ ਪਾ ਕੇ ਨੌਜਵਾਨ ਨੇ ਡਰੇਨ ਕੋਲ ਔਰਤ ਦਾ ਪਰਸ ਖੋਹਣ ਦੀ ਕੋਸ਼ਿਸ਼ ਕੀਤੀ। ਔਰਤ ਨੇ ਬਹਾਦਰੀ ਦਿਖਾਉਂਦੇ ਹੋਏ ਪਰਸ ਦੇਣ ਤੋਂ ਸਾਫ਼ ਮਨ੍ਹਾ ਕਰ ਦਿੱਤਾ। ਇਸ ‘ਤੇ ਨੌਜਵਾਨ ਭੜਕ ਗਿਆ ਅਤੇ ਪਰਸ ਨਾ ਦੇਣ ‘ਤੇ ਔਰਤ ਦੇ ਬੱਚੇ ‘ਤੇ ਚਾਕੂ ਤਾਣ ਦਿੱਤਾ। ਮੁਲਜ਼ਮ ਉਸਨੂੰ ਧਮਕੀਆਂ ਦੇਣ ਲੱਗਾ ਕਿ ਜੇਕਰ ਉਸਨੂੰ ਪਰਸ ਨਾ ਦਿੱਤਾ ਗਿਆ ਤਾਂ ਉਹ ਬੱਚੇ ਨੂੰ ਨੁਕਸਾਨ ਪਹੁੰਚਾ ਦੇਵੇਗਾ। ਇਸ ਦੌਰਾਨ ਔਰਤ ਬੁਰੀ ਤਰ੍ਹਾਂ ਘਬਰਾ ਗਈ, ਉਹ ਸੋਚਣ ਲੱਗੀ ਕਿ ਕਿਸ ਤਰ੍ਹਾਂ ਲੁਟੇਰੇ ਤੋਂ ਆਪਣੇ ਬੱਚੇ ਨੂੰ ਬਚਾਏ।
ਇਸੇ ਦੌਰਾਨ ਉੱਥੋਂ ਇੱਕ ਪੀਆਰਟੀਸੀ ਦੀ ਬੱਸ ਲੰਘ ਰਹੀ ਸੀ, ਬੱਸ ਦੇ ਚਾਲਕ ਨੇ ਜਦੋਂ ਮੁਲਜ਼ਮ ਨੂੰ ਦੇਖਿਆ ਕਿ ਉਸਨੇ ਬੱਚੇ ‘ਤੇ ਚਾਕੂ ਤਾਣਿਆ ਹੋਇਆ ਸੀ ਤਾਂ ਉਸਨੇ ਬੱਸ ਦੀ ਫੇਟ ਮਾਰ ਕੇ ਲੁਟੇਰੇ ਨੂੰ ਹੇਠਾਂ ਸੁੱਟ ਦਿੱਤਾ। ਇਸ ਦੌਰਾਨ ਡਰਾਈਵਰ, ਕੰਡਕਟਰ ਬੱਸ ਤੋਂ ਉੱਤਰੇ, ਸਵਾਰੀਆਂ ਵੀ ਉੱਤਰ ਗਈਆਂ। ਸਾਰਿਆਂ ਨੇ ਮੁਲਜ਼ਮ ਦੀ ਜੰਮ ਕੇ ਛਿੱਤਰ ਪਰੇਡ ਕੀਤੀ। ਮੁਲਜ਼ਮ ਦੀ ਪਛਾਣ ਸੰਦੀਪ ਕੁਮਾਰ ਵਾਸੀ ਪਿੰਡ ਕੈਰੇ ਵਜੋਂ ਹੋਈ ਹੈ ਜਿਸਨੂੰ ਲੋਕਾਂ ਨੇ ਪੁਲਿਸ ਦੇ ਹਵਾਲੇ ਕਰ ਦਿੱਤਾ।