ਮਹਿਲ ਕਲਾਂ/ਬਰਨਾਲਾ, 8 ਸਤੰਬਰ (ਰਵਿੰਦਰ ਸ਼ਰਮਾ) : ਮੀਂਹ ਕਾਰਨ ਜ਼ਿਲ੍ਹਾ ਬਰਨਾਲਾ ਅਧੀਨ ਆਉਂਦੇ ਪਿੰਡ ਵਜੀਦਕੇ ਕਲਾਂ ਵਿਖੇ ਕਈ ਥਾਈ ਅਸਮਾਨੀ ਬਿਜਲੀ ਡਿੱਗਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ, ਜਿਸ ਕਾਰਨ ਪਿੰਡ ਵਾਸੀਆਂ ’ਚ ਡਰ ਤੇ ਸਹਿਮ ਦਾ ਮਹੌਲ ਹੈ। ਇਸ ਅਸਮਾਨੀ ਬਿਜਲੀ ਡਿੱਗਣ ਨਾਲ ਗੁਰਨਾਮ ਸਿੰਘ ਪੁੱਤਰ ਮੇਹਰ ਸਿੰਘ ਅਕਾਲੀ ਦੇ ਘਰ ਲੱਗਾ ਔਲ਼ੇ ਦਾ ਦਰੱਖਤ ਵਿਚਕਾਰੋਂ ਪਾੜ ਦਿੱਤਾ, ਪਿਆਰਾ ਸਿੰਘ ਪੁੱਤਰ ਪ੍ਰਕਾਸ਼ ਸਿੰਘ ਦੇ ਘਰ ਲੱਗਾ ਨਿੰਮ ਦਾ ਟਾਹਣਾ ਤੋੜ ਦਿੱਤਾ ਤੇ ਦਲਵੀਰ ਸਿੰਘ ਗੋਲਡੀ ਦੇ ਘਰ ਨਜ਼ਦੀਕ ਲੱਗੇ ਬਿਜਲੀ ਦੇ ਟਰਾਂਸਫਾਰਮਰ ਦਾ ਜ਼ੋਰਦਾਰ ਧਮਾਕਾ ਹੋਇਆ। ਇਸ ਮੌਕੇ ਗੁਰਨਾਮ ਕੌਰ ਤੇ ਮਹਿਲਾ ਕਿਸਾਨ ਆਗੂ ਕੁਲਵਿੰਦਰ ਕੌਰ ਵਜੀਦਕੇ ਨੇ ਦੱਸਿਆ ਕਿ ਸ਼ਾਮ ਨੂੰ ਚਾਰ ਵਜੇ ਹੋਈ ਬਰਸਾਤ ਸਮੇਂ ਸਾਡੇ ਘਰ ਜ਼ੋਰਦਾਰ ਖੜ੍ਹਾਕਾ ਹੋਇਆ, ਖੜਕਾ ਇੰਨੇ ਜ਼ੋਰ ਨਾਲ ਹੋਇਆ ਕਿ ਆਂਢ-ਗੁਆਂਢ ਦੇ ਘਰਾਂ ਕੇ ਬੂਹੇ ਬਾਰੀਆ ਹਿੱਲ ਗਏ। ਉਨ੍ਹਾਂ ਕਿਹਾ ਅਸਮਾਨੀ ਬਿਜਲੀ ਡਿੱਗਣ ਨਾਲ ਉਨ੍ਹਾਂ ਦੇ ਘਰ ਲੱਗਾ ਔਲੇ ਦਾ ਦਰੱਖਤ ‘ਤੇ ਗੁਆਢੀਆਂ ਦੇ ਘਰ ਲੱਗਾ ਨਿੰਮ ਦਾ ਟਾਹਣਾ ਪਾੜ ਗਿਆ। ਦਲਵੀਰ ਸਿੰਘ ਗੋਲਡੀ ਤੇ ਮਿਸਤਰੀ ਗੁਲਾਬ ਸਿੰਘ ਨੇ ਦੱਸਿਆ ਕਿ ਅਸਮਾਨੀ ਬਿਜਲੀ ਉਨ੍ਹਾਂ ਦੇ ਘਰ ਦੇ ਨਜ਼ਦੀਕ ਲੱਗੇ ਬਿਜਲੀ ਦੇ ਟਰਾਂਸਫਰਮਰ ‘ਤੇ ਵੀ ਡਿੱਗੀ ਹੈ। ਉਨ੍ਹਾਂ ਦੱਸਿਆ ਕਿ ਮੀਂਹ ਪੈਣ ਸਮੇਂ ਇੱਕ ਚਿੱਟੇ ਰੰਗ ਦੀ ਤਾਰ ਜਿਹੀ ਆਈ ਤੇ ਟਰਾਂਸਫਰਮਰ ਨਾਲ ਟਕਰਾ ਗਈ। ਇਸ ਤੋਂ ਬਾਅਦ ਬਹੁਤ ਹੀ ਜ਼ੋਰ ਦਾ ਖੜਾਕ ਹੋਇਆ ਤੇ ਬਿਜਲੀ ਸਪਲਾਈ ਬੰਦ ਹੋ ਗਈ। ਉਨ੍ਹਾਂ ਕਿਹਾ ਬਿਜਲੀ ਡਿੱਗਣ ਸਮੇਂ ਲੋਕ ਘਰਾਂ ‘ਚ ਸਨ, ਨਹੀਂ ਤਾਂ ਕੋਈ ਹੋਰ ਵੀ ਭਾਰੀ ਨੁਕਸਾਨ ਹੋ ਸਕਦਾ ਸੀ ।
Posted inਬਰਨਾਲਾ
