ਅਧਿਆਪਕਾਂ ਲਈ ਕਿਸੇ ਬਿਮਾਰੀ ’ਤੇ ਸੀ.ਐਮ.ਓ. ਸਰਟੀਫਿਕੇਟ ਲਾਜ਼ਮੀ
ਚੰਡੀਗੜ੍ਹ, 25 ਫਰਵਰੀ (ਰਵਿੰਦਰ ਸ਼ਰਮਾ) : ਪ੍ਰੀਖਿਆਵਾਂ ਦੀ ਪਾਰਦਰਸ਼ਤਾ, ਸਮੇਂ ਸਿਰ ਨਤੀਜੇ ਅਤੇ ਮੁਲਾਂਕਣ ਪ੍ਰਕਿਰਿਆ ਵਿੱਚ ਜਵਾਬਦੇਹੀ ਯਕੀਨੀ ਬਣਾਉਣ ਦੇ ਉਦੇਸ਼ ਨਾਲ ਪੀ.ਐਸ.ਈ.ਬੀ. (PSEB) ਨੇ ਸਖ਼ਤ ਰੁਖ਼ ਅਪਣਾਇਆ ਹੈ। ਬੋਰਡ ਨੇ ਸਪੱਸ਼ਟ ਸੰਕੇਤ ਦਿੱਤੇ ਹਨ ਕਿ ਪ੍ਰੀਖਿਆ ਡਿਊਟੀ ਜਾਂ ਉੱਤਰ ਪੱਤਰੀਆਂ ਦੇ ਮੁਲਾਂਕਣ ਤੋਂ ਬਚਣ ਲਈ ਬਿਮਾਰੀ ਦਾ ਬਹਾਨਾ ਹੁਣ ਸਵੀਕਾਰ ਨਹੀਂ ਕੀਤਾ ਜਾਵੇਗਾ।
ਬੋਰਡ ਦੇ ਨਿਰਦੇਸ਼ਾਂ ਅਨੁਸਾਰ ਜੇਕਰ ਕੋਈ ਅਧਿਆਪਕ ਸਿਹਤ ਕਾਰਨਾਂ ਕਰਕੇ ਪ੍ਰੀਖਿਆ ਡਿਊਟੀ ਜਾਂ ਮੁਲਾਂਕਣ ਕਾਰਜ ਤੋਂ ਛੋਟ ਚਾਹੁੰਦਾ ਹੈ, ਤਾਂ ਉਸ ਨੂੰ ਸਿਵਲ ਸਰਜਨ ਜਾਂ ਸੀ.ਐਮ.ਓ. (CMO) ਪੱਧਰ ਦਾ ਅਧਿਕਾਰਤ ਮੈਡੀਕਲ ਪ੍ਰਮਾਣ ਪੱਤਰ ਸਬੰਧਤ ਡੀ.ਈ.ਓ. (DEO) ਨੂੰ ਪੇਸ਼ ਕਰਨਾ ਲਾਜ਼ਮੀ ਹੋਵੇਗਾ। ਸੂਤਰਾਂ ਅਨੁਸਾਰ, ਪਿਛਲੇ ਸਾਲਾਂ ਵਿੱਚ ਪ੍ਰੀਖਿਆ ਕਾਰਜਾਂ ਤੋਂ ਬਚਣ ਲਈ ਫਰਜ਼ੀ ਜਾਂ ਹਲਕੇ ਪੱਧਰ ਦੇ ਮੈਡੀਕਲ ਸਰਟੀਫਿਕੇਟ ਪੇਸ਼ ਕੀਤੇ ਜਾਣ ਦੀਆਂ ਸ਼ਿਕਾਇਤਾਂ ਸਾਹਮਣੇ ਆਈਆਂ ਸਨ। ਕਈ ਜ਼ਿਲ੍ਹਿਆਂ ਵਿੱਚ ਡੀ.ਈ.ਓ. ਨੇ ਸਿਵਲ ਸਰਜਨਾਂ ਨੂੰ ਪੱਤਰ ਲਿਖ ਕੇ ਸਪੱਸ਼ਟ ਕੀਤਾ ਹੈ ਕਿ ਕੇਵਲ ਅਸਲ ਅਤੇ ਗੰਭੀਰ ਸਿਹਤ ਮਾਮਲਿਆਂ ਵਿੱਚ ਹੀ ਪ੍ਰਮਾਣ ਪੱਤਰ ਜਾਰੀ ਕੀਤੇ ਜਾਣ। ਜੇਕਰ ਜਾਂਚ ਵਿੱਚ ਅਧਿਆਪਕ ਅਸਲ ਵਿੱਚ ਅਸਵਸਥ ਪਾਇਆ ਜਾਂਦਾ ਹੈ, ਤਾਂ ਡੀ.ਈ.ਓ. ਤੁਰੰਤ ਬਦਲਵੇਂ ਅਧਿਆਪਕ ਦੀ ਨਿਯੁਕਤੀ ਕਰੇਗਾ ਤਾਂ ਜੋ ਪ੍ਰੀਖਿਆ ਪ੍ਰਕਿਰਿਆ ਵਿੱਚ ਕੋਈ ਰੁਕਾਵਟ ਨਾ ਆਵੇ।
ਬੋਰਡ ਨੇ ਹੁਕਮ ਜਾਰੀ ਕੀਤੇ ਹਨ ਕਿ ਪ੍ਰੀਖਿਅਕਾਂ ਦੀ ਨਿਯੁਕਤੀ ਡੀ.ਈ.ਓ. ਪੱਧਰ ’ਤੇ ਹੋਵੇਗੀ। ਇਸ ਨਾਲ ਚੋਣ ਪ੍ਰਕਿਰਿਆ ਵਿੱਚ ਪਾਰਦਰਸ਼ਤਾ ਅਤੇ ਜਵਾਬਦੇਹੀ ਯਕੀਨੀ ਹੋਵੇਗੀ। 10ਵੀਂ ਅਤੇ 12ਵੀਂ ਜਮਾਤਾਂ ਦੀ ਤਰ੍ਹਾਂ 8ਵੀਂ ਜਮਾਤ ਦੀਆਂ ਉੱਤਰ ਪੱਤਰੀਆਂ ਦਾ ਮੁਲਾਂਕਣ ਵੀ ‘ਤਾਲਿਕਾ ਅੰਕਨ ਵਿਧੀ’ ਰਾਹੀਂ ਕੀਤਾ ਜਾਵੇਗਾ। ਪੀ.ਐਸ.ਈ.ਬੀ. ਨੇ ਨਿਰਦੇਸ਼ ਦਿੱਤੇ ਹਨ ਕਿ ਪ੍ਰੀਖਿਅਕਾਂ ਦੀ ਲੋੜ ਪੈਣ ‘ਤੇ ਛੁੱਟੀਆਂ ਦੌਰਾਨ ਵੀ ਮੁਲਾਂਕਣ ਲਾਜ਼ਮੀ ਹੋਵੇਗਾ। ਮਾਰਕਿੰਗ ਐਪ ਨਾਲ ਸਬੰਧਤ ਕਿਸੇ ਵੀ ਤਕਨੀਕੀ ਸਮੱਸਿਆ ਦੀ ਸ਼ਿਕਾਇਤ ਕੇਵਲ ਅਧਿਕਾਰਤ ‘ਕਵੇਰੀ ਪੋਰਟਲ’ ਰਾਹੀਂ ਹੀ ਦਰਜ ਕਰਵਾਉਣੀ ਹੋਵੇਗੀ। ਕਿਸੇ ਹੋਰ ਮਾਧਿਅਮ ਰਾਹੀਂ ਭੇਜੀਆਂ ਗਈਆਂ ਸ਼ਿਕਾਇਤਾਂ ‘ਤੇ ਵਿਚਾਰ ਨਹੀਂ ਕੀਤਾ ਜਾਵੇਗਾ। ਬੋਰਡ ਨੇ ਕਿਹਾ ਕਿ 8ਵੀਂ ਜਮਾਤ ਦੀਆਂ ਕਾਪੀਆਂ ਦੀ ਜਾਂਚ ਲਈ ਕੋਈ ਵਾਧੂ ਮਿਹਨਤਾਨਾ ਨਹੀਂ ਦਿੱਤਾ ਜਾਵੇਗਾ। ਹਾਲਾਂਕਿ, 10ਵੀਂ ਅਤੇ 12ਵੀਂ ਦੀ ਤਰਜ਼ ‘ਤੇ 8ਵੀਂ ਦੀ ਮਾਰਕਿੰਗ ਵੀ ਤਾਲਿਕਾ ਅੰਕਨ ਵਿਧੀ ਨਾਲ ਕੀਤੀ ਜਾਵੇਗੀ। ਵਿਸ਼ੇਸ਼ ਹਾਲਤਾਂ ਵਿੱਚ, ਕੇਂਦਰ ਤਾਲਮੇਲਕ ਦੀ ਇਜਾਜ਼ਤ ਨਾਲ ਪ੍ਰੀਖਿਅਕ ਆਪਣੇ ਸੇਵਾ ਖੇਤਰ ਵਿੱਚ ਕਾਪੀਆਂ ਲਿਜਾ ਕੇ ਜਾਂਚ ਕਰ ਸਕਦਾ ਹੈ।
Posted inਚੰਡੀਗੜ੍ਹ
