ਨਵੀਂ ਦਿੱਲੀ, 13 ਮਾਰਚ (ਰਵਿੰਦਰ ਸ਼ਰਮਾ) : ਪਿਛਲੀ ਸੂਬਾ ਸਰਕਾਰ ਦੇ ਕਾਰਜਕਾਲ ਦੌਰਾਨ ਵੱਖ-ਵੱਖ ਵਿਭਾਗਾਂ ਵਿਚ ਹੋਏ ਘੁਟਾਲਿਆਂ ਦੇ ਮਾਮਲੇ ਵਿਚ ਹੁਣ ਕੇਸ ਦਰਜ ਹੋਣੇ ਸ਼ੁਰੂ ਹੋ ਗਏ ਹਨ। ਸੜਕਾਂ ਅਤੇ ਨਾਲਿਆਂ ਦੇ ਨਿਰਮਾਣ ਵਿਚ ਲਗਭਗ 5.5 ਕਰੋੜ ਰੁਪਏ ਦੇ ਘੁਟਾਲੇ ਦਾ ਪਤਾ ਲੱਗਣ ‘ਤੇ ਦਿੱਲੀ ਸਰਕਾਰ ਦੀ ਭ੍ਰਿਸ਼ਟਾਚਾਰ ਨਿਰੋਧਕ ਸ਼ਾਖਾ (ਏਸੀਬੀ) ਵਿਚ ਸਿੰਚਾਈ ਅਤੇ ਹੜ੍ਹ ਨਿਯੰਤਰਣ ਵਿਭਾਗ ਦੇ ਨਿਲੰਬਿਤ ਅਧਿਕਾਰੀ ਗਗਨ ਕੁਰਿਲ ਸਮੇਤ ਹੋਰਾਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਗਿਆ ਹੈ।
ਨਵੀਂ ਸਰਕਾਰ ਦੇ ਗਠਨ ਤੋਂ ਬਾਅਦ ਇਹ ਘੁਟਾਲੇ ਦਾ ਪਹਿਲਾ ਮਾਮਲਾ ਹੈ ਜਦੋਂ ਸਰਕਾਰ ਤੋਂ ਹਰੀ ਝੰਡੀ ਮਿਲਣ ‘ਤੇ ਏਸੀਬੀ ਨੇ ਭ੍ਰਿਸ਼ਟਾਚਾਰ ਨਿਵਾਰਣ ਅਧਿਨਿਯਮ, ਧੋਖਾਧੜੀ ਦੀਆਂ ਵੱਖ-ਵੱਖ ਧਾਰਾਵਾਂ ਅਤੇ ਅਪਰਾਧਿਕ ਸਾਜ਼ਿਸ਼ ਰਚਣ ਦੀ ਧਾਰਾ ਵਿਚ ਕੇਸ ਦਰਜ ਕੀਤਾ ਹੈ। ਚਾਰ ਕਾਰਜਾਂ ਵਿਚ ਬਿਨਾਂ ਕੰਮ ਕੀਤੇ ਠੇਕੇਦਾਰਾਂ ਨੂੰ 100 ਫੀਸਦੀ ਭੁਗਤਾਨ ਕਰ ਦਿੱਤਾ ਗਿਆ ਅਤੇ ਕਾਗਜ਼ਾਂ ਵਿਚ ਕੰਮ ਪੂਰਾ ਹੋਣਾ ਦਿਖਾ ਦਿੱਤਾ ਗਿਆ।
ਸ਼ਾਮਿਲ ਹੋ ਸਕਦੇ ਹਨ ਲਗਭਗ ਅੱਧਾ ਦਰਜਨ ਠੇਕੇਦਾਰ
ਏਸੀਬੀ ਦੇ ਸੰਯੁਕਤ ਕਮਿਸ਼ਨਰ ਮਧੁਰ ਵਰਮਾ ਦਾ ਕਹਿਣਾ ਹੈ ਕਿ ਗਗਨ ਕੁਰਿਲ ਦੇ ਨਾਲ ਇਸ ਘੁਟਾਲੇ ਵਿਚ ਸਿੰਚਾਈ ਅਤੇ ਹੜ੍ਹ ਨਿਯੰਤਰਣ ਵਿਭਾਗ ਦੇ ਚਾਰ-ਪੰਜ ਹੋਰ ਅਧਿਕਾਰੀ ਅਤੇ ਲਗਪਗ ਅੱਧਾ ਦਰਜਨ ਠੇਕੇਦਾਰ ਸ਼ਾਮਿਲ ਹੋ ਸਕਦੇ ਹਨ। ਜਿਵੇਂ-ਜਿਵੇਂ ਜਾਂਚ ਅੱਗੇ ਵਧੇਗੀ, ਘੁਟਾਲੇ ਵਿਚ ਸ਼ਾਮਿਲ ਦੋਸ਼ੀਆਂ ਦੇ ਨਾਮਾਂ ਦਾ ਪਤਾ ਲੱਗਦਾ ਜਾਵੇਗਾ।
ਮੁਰੰਮਤ ਅਤੇ ਰੰਗ-ਰੋਗਨ ਕੰਮ ਦਾ ਸੀ ਠੇਕਾ
ਇਸ ਤੋਂ ਬਾਅਦ ਸਬੂਤ ਇਕੱਠੇ ਕਰਨ ਤੋਂ ਬਾਅਦ ਉਨ੍ਹਾਂ ਨੂੰ ਗ੍ਰਿਫਤਾਰ ਕੀਤਾ ਜਾਵੇਗਾ। ਜਿਨ੍ਹਾਂ ਚਾਰ ਕਾਰਜਾਂ ਵਿਚ ਘੁਟਾਲੇ ਦਾ ਪਤਾ ਲੱਗਾ ਹੈ, ਉਨ੍ਹਾਂ ਵਿਚ ਤਿੰਨ ਸਿਰਸਪੁਰ ਪਿੰਡ, ਲਾਲ ਡੋਰਾ ਖੇਤਰ, ਉੱਤਰੀ ਦਿੱਲੀ ਵਿਚ ਨਾਲਿਆਂ ਅਤੇ ਦੋਹਾਂ ਪਾਸਿਆਂ ਦੀਆਂ ਕੁਝ ਸੜਕਾਂ ਦੇ ਨਿਰਮਾਣ ਕਾਰਜ ਸ਼ਾਮਿਲ ਹਨ। ਇਨ੍ਹਾਂ ਵਿਚ ਇਕ ਠੇਕਾ 1.5 ਕਰੋੜ, ਦੂਜਾ ਦੋ ਕਰੋੜ ਅਤੇ ਤੀਜਾ 1.67 ਕਰੋੜ ਦਾ ਸੀ। ਇਸ ਤੋਂ ਇਲਾਵਾ ਬੁਰਾੜੀ ਵਿਚ ਲਗਪਗ 50 ਲੱਖ ਦਾ ਮੁਰੰਮਤ ਅਤੇ ਰੰਗ-ਰੋਗਨ ਕੰਮ ਦਾ ਠੇਕਾ ਸੀ।
ਇਨ੍ਹਾਂ ਅਧਿਕਾਰੀਆਂ ਖ਼ਿਲਾਫ਼ ਮਿਲੀ ਸੀ ਸ਼ਿਕਾਇਤ
ਕੁਝ ਮਹੀਨੇ ਪਹਿਲਾਂ ਘੁਟਾਲੇ ਦੀ ਜਾਣਕਾਰੀ ਮਿਲਣ ‘ਤੇ ਅਧਿਕਾਰੀ ਗਗਨ ਕੁਰਿਲ ਨੂੰ ਨਿਲੰਬਿਤ ਕਰ ਦਿੱਤਾ ਗਿਆ ਸੀ। ਹੁਣ ਉਨ੍ਹਾਂ ਖ਼ਿਲਾਫ਼ ਕੇਸ ਦਰਜ ਕਰਾਇਆ ਗਿਆ ਹੈ। ਨਿੱਜੀ ਠੇਕੇਦਾਰਾਂ ਦੀ ਮਿਲੀਭੁਗਤ ਨਾਲ ਗਗਨ ਕੁਰਿਲ ਨੇ ਇਹ ਕੀਤਾ। ਕੁਝ ਦਿਨ ਪਹਿਲਾਂ ਏਸੀਬੀ ਨੂੰ ਸਿੰਚਾਈ ਅਤੇ ਹੜ੍ਹ ਨਿਯੰਤਰਣ ਵਿਭਾਗ ਦੇ ਅਧਿਕਾਰੀਆਂ ਖ਼ਿਲਾਫ਼ ਸ਼ਿਕਾਇਤ ਮਿਲੀ ਸੀ। ਸ਼ਿਕਾਇਤ ਵਿਚ ਸਰਕਾਰੀ ਅਧਿਕਾਰੀਆਂ ਦੁਆਰਾ ਠੇਕੇਦਾਰਾਂ ਨੂੰ ਕੀਤੇ ਗਏ ਜਾਲਸਾਜ਼ੀ ਭੁਗਤਾਨ ਦੀ ਜਾਣਕਾਰੀ ਦਿੱਤੀ ਗਈ।
ਏਸੀਬੀ ਨੂੰ ਸ਼ਿਕਾਇਤ ਦੇਣ ਤੋਂ ਪਹਿਲਾਂ ਸਿੰਚਾਈ ਅਤੇ ਹੜ੍ਹ ਨਿਯੰਤਰਣ ਵਿਭਾਗ ਦੇ ਮੁੱਖ ਸਕੱਤਰ ਦੁਆਰਾ ਇੰਜੀਨੀਅਰ ਦੀ ਇਕ ਕਮੇਟੀ ਗਠਿਤ ਕੀਤੀ ਗਈ ਜਿਸ ਨੇ ਹਰ ਮਾਮਲੇ ਦੀ ਗਹਿਰਾਈ ਨਾਲ ਜਾਂਚ ਕੀਤੀ। ਛੇ ਕਾਰਜਾਂ ਦੀ ਜਾਂਚ ਤੋਂ ਬਾਅਦ ਕਮੇਟੀ ਨੇ ਸੰਬੰਧਿਤ ਅਧਿਕਾਰੀ ਨੂੰ ਆਪਣੀ ਰਿਪੋਰਟ ਸੌਂਪ ਦਿੱਤੀ ਸੀ, ਜਿਨ੍ਹਾਂ ਵਿਚ ਚਾਰ ਕਾਰਜਾਂ ਵਿਚ ਬਿਨਾਂ ਕੰਮ ਕੀਤੇ 100 ਫੀਸਦੀ ਭੁਗਤਾਨ ਅਤੇ ਇਕ ਕਾਰਜ ਵਿਚ ਅਧਿਕਾਰ ਤੋਂ ਬਾਹਰ ਜਾ ਕੇ ਗੈਰ-ਅਧਿਕਾਰਿਤ ਤੌਰ ‘ਤੇ ਕੰਮ ਕਰਨ ਦੀ ਗੱਲ ਆਖੀ ਗਈ। ਏਸੀਬੀ ਦੀ ਆਰੰਭਿਕ ਜਾਂਚ ਅਤੇ ਕਮੇਟੀ ਦੀ ਰਿਪੋਰਟ ਨਾਲ ਦੋਸ਼ਾਂ ਦੀ ਪੁਸ਼ਟੀ ਹੋਣ ‘ਤੇ ਕੇਸ ਦਰਜ ਕਰ ਲਿਆ ਗਿਆ।
