ਮੋਮੋਜ਼ ਫੈਕਟਰੀ ’ਚੋਂ ਮਿਲਿਆ ਮੀਟ ਦਾ ਟੁਕੜਾ ਕੁੱਤੇ ਦਾ ਨਹੀਂ ਸੀ, ਜਾਂਚ ’ਚ ਹੋਇਆ ਵੱਡਾ ਖੁਲਾਸਾ

ਮੁਹਾਲੀ, 23 ਮਾਰਚ (ਰਵਿੰਦਰ ਸ਼ਰਮਾ) :  ਹਾਲ ਹੀ ’ਚ ਮੋਹਾਲੀ ਦੀ ਮੋਮੋਜ਼ ਫੈਕਟਰੀ ‘ਚੋਂ ਮਿਲੇ ਮੀਟ ਦੇ ਟੁਕੜੇ ਦੀ ਜਾਂਚ ’ਚ ਸਾਹਮਣੇ ਆਇਆ ਹੈ ਕਿ ਇਹ ਕੁੱਤੇ ਦੇ ਮੀਟ ਦਾ ਨਹੀਂ ਬਲਕਿ ਬੱਕਰੇ ਦਾ ਹੈ। ਮਾਹਿਰਾਂ ਦੀ ਟੀਮ ਨੇ ਜਾਂਚ ਕਰ ਕੇ ਇਸ ਦੀ ਪੁਸ਼ਟੀ ਕੀਤੀ ਹੈ। ਮੀਟ ਦੇ ਇਸ ਟੁਕੜੇ ਦਾ ਵਜ਼ਨ ਅੱਧਾ ਕਿੱਲੋ ਸੀ ਅਤੇ ਇਹ 10 ਇੰਚ ਅਤੇ 6 ਇੰਚ ਲੰਬਾ ਅਤੇ ਚੌੜਾ ਸੀ, ਜੋ ਕਿ ਕੁੱਤੇ ਦਾ ਨਹੀਂ ਹੋ ਸਕਦਾ।

ਮੀਟ ਦੇ ਨਮੂਨੇ ਸਾਹਮਣੇ ਆਏ

ਉਨ੍ਹਾਂ ਦੱਸਿਆ ਕਿ ਮੋਮੋਜ਼ ਫੈਕਟਰੀ ਦੀ ਸੂਚਨਾ ਮਿਲਣ ਤੋਂ ਬਾਅਦ ਜਾਂਚ ਕੀਤੀ ਗਈ। ਸਫ਼ਾਈ ਅਤੇ ਉਚਿਤ ਸਵੱਛਤਾ ਵਰਗੇ ਮਾਮਲਿਆਂ ਵਿੱਚ ਉਲੰਘਣਾਵਾਂ ਸਨ। ਉਥੋਂ ਖਾਣ-ਪੀਣ ਦੀਆਂ ਵਸਤਾਂ ਅਤੇ ਹੋਰ ਸਮੱਗਰੀ ਦੇ ਨਮੂਨੇ ਸਮੇਤ ਮੀਟ ਦੇ ਟੁਕੜੇ ਦਾ ਸੈਂਪਲ ਲਿਆ ਗਿਆ। ਸੈਂਪਲ ਜਾਂਚ ਲਈ ਮਾਹਿਰਾਂ ਕੋਲ ਭੇਜੇ ਗਏ ਸਨ। ਉਸ ਦੀ ਜਾਂਚ ਦੌਰਾਨ ਇਹ ਤੱਥ ਸਾਹਮਣੇ ਆਏ ਹਨ।

ਲੋਕਾਂ ਨੇ ਖੁਦ ਹੀ ਵੀਡੀਓ ਵਾਇਰਲ ਕਰ ਦਿੱਤੀ
ਇਹ ਮਾਮਲਾ ਸ਼ਨੀਵਾਰ ਨੂੰ ਉਸ ਸਮੇਂ ਸਾਹਮਣੇ ਆਇਆ ਜਦੋਂ ਪਿੰਡ ਵਾਸੀਆਂ ਨੇ ਫੈਕਟਰੀ ਦੀ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ ’ਤੇ ਵਾਇਰਲ ਕਰ ਦਿੱਤੀ। ਇਸ ਤੋਂ ਬਾਅਦ ਸਿਹਤ ਵਿਭਾਗ ਦੀ ਟੀਮ ਨੇ ਖੁਦ ਨੋਟਿਸ ਲੈਂਦਿਆਂ ਛਾਪੇਮਾਰੀ ਕਰ ਕੇ ਮੌਕੇ ’ਤੇ ਮੌਜੂਦ ਸਾਮਾਨ ਨੂੰ ਨਸ਼ਟ ਕਰ ਦਿੱਤਾ।

ਵੀਡੀਓ ’ਚ ਸਾਫ ਦਿਖਾਈ ਦੇ ਰਿਹਾ ਸੀ ਕਿ ਮੋਮੋਜ਼ ਲਈ ਗੰਦੀ ਗੋਭੀ ਰੱਖੀ ਗਈ ਸੀ। ਇਸ ਤੋਂ ਇਲਾਵਾ ਬਾਥਰੂਮ ਵਿੱਚ ਸਾਮਾਨ ਰੱਖਿਆ ਹੋਇਆ ਸੀ। ਗੰਦੇ ਤੇਲ ਦੀ ਵਰਤੋਂ ਕੀਤੀ ਜਾ ਰਹੀ ਸੀ। ਹਾਲਾਂਕਿ ਪਿੰਡ ਵਾਸੀਆਂ ਨੇ ਇਸ ਕਾਰਵਾਈ ਨੂੰ ਮਹਿਜ਼ ਮਨਮਰਜ਼ੀ ਕਰਾਰ ਦਿੱਤਾ ਹੈ।

ਇਸ ਤੋਂ ਬਾਅਦ ਸੋਮਵਾਰ ਨੂੰ ਫਿਰ ਟੀਮਾਂ ਮਟੌਰ ਪਿੰਡ ਪਹੁੰਚੀਆਂ ਅਤੇ ਤਲਾਸ਼ੀ ਮੁਹਿੰਮ ਚਲਾਈ। ਹਾਲਾਂਕਿ ਬਾਅਦ ’ਚ ਜਦੋਂ ਲੋਕਾਂ ਨੇ ਖੁਦ ਫਰਿੱਜ ਖੋਲ੍ਹਿਆ ਤਾਂ ਇਕ ਜਾਨਵਰ ਦਾ ਸਿਰ ਮਿਲਿਆ। ਹੁਣ ਜ਼ਿਲ੍ਹਾ ਪ੍ਰਸ਼ਾਸਨ ਇਸ ਮਾਮਲੇ ਵਿੱਚ ਕਾਰਵਾਈ ਲਈ ਰਣਨੀਤੀ ਬਣਾ ਰਿਹਾ ਹੈ।

ਟਰਾਈ ਸਿਟੀ ’ਚ ਦੋ ਸਾਲਾਂ ਤੋਂ ਸਪਲਾਈ
ਲੋਕਾਂ ਅਨੁਸਾਰ ਇਹ ਕੰਪਨੀ ਪਿਛਲੇ ਦੋ ਸਾਲਾਂ ਤੋਂ ਮੁਹਾਲੀ ਵਿੱਚ ਚੱਲ ਰਹੀ ਸੀ, ਜਿੱਥੇ ਨੇਪਾਲੀ ਮੂਲ ਦੇ ਅੱਠ ਤੋਂ ਦਸ ਵਿਅਕਤੀ ਕੰਮ ਕਰਦੇ ਸਨ। ਇਸ ਸਬੰਧੀ ਕਾਫੀ ਸਮੇਂ ਤੋਂ ਸ਼ਿਕਾਇਤਾਂ ਆ ਰਹੀਆਂ ਸਨ। ਦੱਸਿਆ ਜਾ ਰਿਹਾ ਹੈ ਕਿ ਇੱਥੇ ਬਣੇ ਨੂਡਲਜ਼ ਅਤੇ ਮੋਮੋਜ਼ ਚੰਡੀਗੜ੍ਹ, ਮੋਹਾਲੀ ਅਤੇ ਪੰਚਕੂਲਾ ਨੂੰ ਸਪਲਾਈ ਕੀਤੇ ਜਾਂਦੇ ਸਨ।
ਲੋਕਾਂ ਨੇ ਦੱਸਿਆ ਕਿ ਇਸ ਫੈਕਟਰੀ ਵਿੱਚ ਰੋਜ਼ਾਨਾ ਵੱਡੀ ਮਾਤਰਾ ਵਿੱਚ ਖਾਣ-ਪੀਣ ਦੀਆਂ ਵਸਤੂਆਂ ਤਿਆਰ ਕੀਤੀਆਂ ਜਾਂਦੀਆਂ ਸਨ ਅਤੇ ਇਸ ਤੋਂ ਇਲਾਵਾ ਗੱਡਿਆਂ ਰਾਹੀਂ ਮੋਮੋ ਵੀ ਵੇਚੇ ਜਾਂਦੇ ਸਨ। ਉਨ੍ਹਾਂ ਮੰਗ ਕੀਤੀ ਸੀ ਕਿ ਇਸ ਮਾਮਲੇ ਵਿੱਚ ਸਖ਼ਤ ਕਾਰਵਾਈ ਕੀਤੀ ਜਾਵੇ।