ਨਗਰ ਕੌਂਸਲ ਬਰਨਾਲਾ ਦੀ ਲਾਇਬ੍ਰੇਰੀ ਬਣੀ ਲੋੜਵੰਦ ਨੌਜਵਾਨਾਂ ਲਈ ਵਰਦਾਨ

– ਬਰਨਾਲਾ ’ਚ ਬਣਾਈ ਲਾਇਬ੍ਰੇਰੀ ਨੌਜਵਾਨਾਂ ਲਈ ਬੇਹੱਦ ਕਾਰਗਰ ਸਾਬਿਤ ਹੋ ਰਹੀ

ਬਰਨਾਲਾ, 19 ਮਈ (ਰਵਿੰਦਰ ਸ਼ਰਮਾ) : ਮੌਜੂਦਾ ਸਮੇਂ ’ਚ ਜਦੋਂ ਮਹਿੰਗਾਈ ਦੀ ਮਾਰ ਹਰ ਪਾਸੇ ਝੱਲਣੀ ਪੈ ਰਹੀ ਹੈ। ਉਥੇ ਇਸ ਦੌਰ ’ਚ ਮਹਿੰਗੀਆਂ ਪੜ੍ਹਾਈਆਂ ਕਰਨ ਤੋਂ ਬਾਅਦ ਮਹਿੰਗੀ ਟ੍ਰੇਨਿੰਗ ਲੈ ਕੇ ਸਰਕਾਰੀ ਨੌਕਰੀਆਂ ਹਾਸਲ ਕਰਨੀਆਂ ਹਰ ਇਕ ਦੇ ਵੱਸ ਦੀ ਗੱਲ ਨਹੀਂ ਹੈ। ਪਰ ਅਜਿਹੇ ਦੌਰ ’ਚ ਨਗਰ ਕੌਂਸਲ ਬਰਨਾਲਾ ਦੇ ਵਿਹੜੇ ’ਚ ਬਣੀ ਲਾਇਬ੍ਰੇਰੀ ਲੋੜਵੰਦ ਨੌਜਵਾਨਾਂ ਲਈ ਵਰਦਾਨ ਸਾਬਿਤ ਹੋ ਰਹੀ ਹੈ। ਪਿਛਲੇ ਲੰਬੇ ਸਮੇਂ ਤੋਂ ਪ੍ਰਸਿੱਧ ਲੇਖਕ ਰਾਮ ਸਰੂਪ ਅਣਖੀ ਦੇ ਨਾਮ ਉਪਰ ਚੱਲ ਰਹੀ ਇਹ ਲਾਇਬ੍ਰੇਰੀ ਨੌਜਵਾਨਾਂ ਲਈ ਮੁਫਤ ’ਚ ਕੋਚਿੰਗ ਸੈਂਟਰ ਦੀ ਤਰ੍ਹਾਂ ਸੇਵਾਵਾਂ ਦੇ ਰਹੀ ਹੈ। ਇਸ ਲਾਇਬ੍ਰੇਰੀ ’ਚ ਸਰਕਾਰੀ ਨੌਕਰੀਆਂ ਸਮੇਤ ਹਰ ਤਰ੍ਹਾਂ ਦੀਆਂ ਨੌਕਰੀਆਂ ਲਈ ਲੋੜੀਂਦੀਆਂ ਕਿਤਾਬਾਂ, ਟੈਸਟ ਰਸਾਲੇ, ਕੰਪਿਊਟਰ ਤੇ ਇੰਟਰਨੈਟ ਦੀ ਸਹੂਲਤ ਦਿੱਤੀ ਜਾ ਰਹੀ ਹੈ। ਸਵੇਰ ਤੋਂ ਲੈ ਕੇ ਸ਼ਾਮ ਤੱਕ ਇਸ ਲਾਇਬ੍ਰੇਰੀ ’ਚ ਸ਼ਾਂਤਮਈ ਮਾਹੌਲ ’ਚ ਵੱਡੀ ਗਿਣਤੀ ’ਚ ਨੌਜਵਾਨ ਆਪਣੀ ਪੜ੍ਹਾਈ ਕਰਨ ਆ ਰਹੇ ਹਨ। ਇਸ ਲਾਇਬ੍ਰੇਰੀ ਦਾ ਨਵੀਨੀਕਰਨ 2021 ’ਚ ਕੀਤਾ ਗਿਆ। ਇਸ ਲਾਈਬ੍ਰੇਰੀ ’ਚ ਰੋਜ਼ਾਨਾ 100 ਤੋਂ ਵੱਧ ਨੌਜਵਾਨ ਪੜ੍ਹਾਈ ਕਰਨ ਆਉਂਦੇ ਹਨ। ਲਾਇਬ੍ਰੇਰੀ ’ਚ ਪੜ੍ਹਾਈ ਕਰਕੇ ਹੁਣ ਤੱਕ 45 ਤੋਂ ਵੱਧ ਨੌਜਵਾਨ ਸਰਕਾਰੀ ਨੌਕਰੀਆਂ ਹਾਸਲ ਕਰ ਚੁੱਕੇ ਹਨ। ਇਥੇ ਕੇਵਲ ਬਰਨਾਲਾ ਜ਼ਿਲ੍ਹੇ ਦੇ ਹੀ ਨਹੀਂ ਬਲਕਿ ਆਸ ਪਾਸ ਦੇ ਮਾਨਸਾ, ਬਠਿੰਡਾ ਤੇ ਸੰਗਰੂਰ ਇਸ ਲਾਇਬ੍ਰੇਰੀ ’ਚ ਬਠਿੰਡਾ, ਮਾਨਸਾ, ਸੰਗਰੂਰ ਜ਼ਿਲ੍ਹਿਆਂ ਦੇ ਨੌਜਵਾਨ ਪੜ੍ਹਨ ਲਈ ਆਉਂਦੇ ਹਨ। ਇਸ ਲਾਈਬ੍ਰੇਰੀ ’ਚ ਹਰ ਇਕ ਭਾਸ਼ਾ ਦਾ ਅਖਬਾਰ ਤੇ ਮੈਗਜ਼ੀਨ ਉਪਲਬਧ ਹੈ। ਇਹ ਲਾਈਬ੍ਰੇਰੀ ਸਵੇਰੇ 8 ਤੋਂ ਸ਼ਾਮ 8 ਵਜੇ ਤੱਕ 12 ਘੰਟੇ ਖੁੱਲੀ ਰਹਿੰਦੀ ਹੈ। ਲਾਇਬ੍ਰੇਰੀਅਨ ਤੇਜਿੰਦਰ ਸਿੰਘ ਨੇ ਦੱਸਿਆ ਕਿ ਇਸ ਲਾਇਬ੍ਰੇਰੀ ਦਾ ਸਮਾਂ ਸਵੇਰੇ 8 ਵਜੇ ਤੋਂ ਸ਼ਾਮ 8 ਵਜੇ ਦਾ ਰੱਖਿਆ ਗਿਆ ਹੈ `ਇਸ ਲਾਇਬ੍ਰੇਰੀ ’ਚ ਪੜ੍ਹ ਕੇ 45 ਤੋਂ ਵੱਧ ਬੱਚੇ ਨੌਕਰੀਆਂ ਹਾਸਲ ਕਰ ਚੁੱਕੇ ਹਨ। ਜਦਕਿ 60 ਦੇ ਕਰੀਬ ਅਜਿਹੇ ਨੌਜਵਾਨ ਵੀ ਹਨ, ਜਿਨਾਂ ਨੇ ਆਪਣਾ ਟੈਸਟ ਤਾਂ ਪਾਸ ਕਰ ਲਿਆ ਪਰ ਉਹ ਮੈਰਿਟ ਲਿਸਟ ’ਚ ਨਹੀਂ ਆ ਸਕੇ। ਉਨ੍ਹਾਂ ਕਿਹਾ ਕਿ ਇਸ ਲਾਇਬ੍ਰੇਰੀ ’ਚ ਰੋਜਾਨਾ 100 ਤੋਂ ਵੱਧ ਬੱਚੇ ਪੜਨ ਲਈ ਆਉਂਦੇ ਹਨ। ਇਸ ਲਾਇਬ੍ਰੇਰੀ ’ਚ ਬੱਚੇ ਨੀਟ, ਕਲੈਰੀਕਲ, ਯੂਪੀਐਸਸੀ ਤੇ ਹੋਰ ਵੱਖ-ਵੱਖ ਪ੍ਰੀਖਿਆਵਾਂ ਦੀ ਤਿਆਰੀ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਇਸ ਲਾਇਬ੍ਰੇਰੀ ’ਚ ਸੰਗਰੂਰ, ਬਠਿੰਡਾ, ਮਾਨਸਾ, ਬਰਨਾਲਾ ਚਾਰ ਜ਼ਿਲ੍ਹਿਆਂ ਦੇ ਵਿਦਿਆਰਥੀ ਆਉਂਦੇ ਹਨ।
– ਵਿਦਿਆਰਥੀਆਂ ਦੀ ਸਹੂਲਤਾਂ ਦਾ ਧਿਆਨ ਰੱਖਿਆ ਹੋਇਆ
ਵਿਦਿਆਰਥੀ ਮਨਪ੍ਰੀਤ ਕੌਰ ਨੇ ਕਿਹਾ ਕਿ ਉਹ ਪੀਟੈੱਟ-2 ਤੇ ਮਾਸਟਰ ਕੈਡਰ ਦੀ ਤਿਆਰੀ ਪਿਛਲੇ ਦੋ ਸਾਲਾਂ ਤੋਂ ਕਰਦੀ ਆ ਰਹੀ ਹੈ। ਲਾਇਬ੍ਰੇਰੀ ’ਚ ਮਾਹੌਲ ਬਹੁਤ ਜ਼ਿਆਦਾ ਵਧੀਆ ਹੈ। ਇਸ ਲਾਇਬ੍ਰੇਰੀ ’ਚ ਅਜਿਹੇ ਵਿਦਿਆਰਥੀ ਵੀ ਆਉਂਦੇ ਹਨ, ਜੋ ਨੌਕਰੀ ਕਰਦੇ ਹਨ, ਜਿੰਨਾਂ ਤੋਂ ਸੇਧ ਮਿਲਦੀ ਰਹਿੰਦੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਲਾਇਬ੍ਰੇਰੀ ’ਚ ਹਰ ਇਕ ਪੇਪਰ ਲਈ ਕਿਤਾਬਾਂ ਹਨ। ਇਸ ’ਚ ਮਹਿੰਗੀ ਤੋਂ ਮਹਿੰਗੀ ਤੇ ਸਸਤੀ ਕਿਤਾਬ ਮਿਲਦੀ ਹੈ ਤੇ ਇਸ ’ਚ ਅਖਬਾਰ ਤੇ ਮੈਗਜ਼ੀਨ ਹਰ ਇਕ ਭਾਸ਼ਾ ’ਚ ਪੜ੍ਹਨ ਲਈ ਮਿਲਦੇ ਹਨ। ਲਾਈਬ੍ਰੇਰੀ ’ਚ ਸੈਟਿੰਗ ਬਹੁਤ ਵਧੀਆ ਤਰੀਕੇ ਨਾਲ ਕੀਤੀ ਹੋਈ ਹੈ, ਜਿਸ ਤਰਾਂ ਪਰਾਣੇ ਸਟੂਡੈਂਟ ਜਿਹਨਾਂ ਨੂੰ ਬਹੁਤ ਸਮਾਂ ਪੜ੍ਹਦਿਆਂ ਨੂੰ ਹੋ ਗਿਆ ਹੈ। ਉਨਾਂ ਤੋਂ ਨਵੇਂ ਬੱਚਿਆਂ ਨੂੰ ਸੇਧ ਮਿਲਦੀ ਹੈ। ਇਸ ਲਾਇਬ੍ਰੇਰੀ ’ਚ ਆ ਕੇ ਪੜ੍ਹਦੇ ਹੋਏ ਵਿਦਿਆਰਥੀਆਂ ਨੂੰ ਦੇਖ ਕੇ ਆਪਣੇ ਮਨ ਅੰਦਰ ਪੜ੍ਹਨ ਪ੍ਰਤੀ ਉਤਸ਼ਾਹ ਪੈਦਾ ਹੁੰਦਾ ਹੈ। ਉਨਾਂ ਕਿਹਾ ਕਿ ਇਸ ਲਾਈਬ੍ਰੇਰੀ ਦਾ ਏਰੀਆ ਬਹੁਤ ਛੋਟਾ ਹੈ, ਵਿਦਿਆਰਥੀ ਜਿਆਦਾ ਹੋਣ ਕਰਕੇ ਸੀਟਾਂ ਦੀ ਕਮੀ ਹੋ ਜਾਂਦੀ ਹੈ। ਉਨਾਂ ਕਿਹਾ ਕਿ ਇਸ ਤਰ੍ਹਾਂ ਦੀਆਂ ਲਾਇਬ੍ਰੇਰੀਆਂ ਹਰ ਸ਼ਹਿਰ, ਪਿੰਡਾਂ ’ਚ ਹੋਣੀਆਂ ਚਾਹੀਦੀਆਂ ਹਨ ਤਾਂ ਜੋ ਬੱਚੇ ਇਸ ਲਾਇਬ੍ਰੇਰੀ ’ਚ ਪੜ੍ਹ ਕੇ ਆਪਣਾ ਭਵਿੱਖ ਕਾਮਯਾਬ ਬਣਾ ਸਕਦੇ ਹਨ।

– 12 ਘੰਟੇ ਖੁੱਲ੍ਹੀ ਰਹਿੰਦੀ ਲਾਇਬ੍ਰੇਰੀ
ਪੜ੍ਹਾਈ ਕਰਨ ਆਉਂਦੇ ਸਾਗਰਦੀਪ ਸਿੰਘ ਨੇ ਦੱਸਿਆ ਕਿ ਉਹ ਸਿਵਲ ਸਰਵਿਸਿਜ਼ ਦੀ ਤਿਆਰੀ ਕਰਨ ਲਈ ਪਿਛਲੇ ਇਕ ਸਾਲ ਤੋਂ ਇਸ ਲਾਇਬ੍ਰੇਰੀ ’ਚ ਪੜ੍ਹਨ ਲਈ ਆ ਰਹੇ ਹਨ। ਉਨਾਂ ਕਿਹਾ ਕਿ ਲਾਇਬ੍ਰੇਰੀ ’ਚ ਲੋੜੀਂਦੀ ਹਰ ਇਕ ਚੀਜ਼ ਦਿੱਤੀ ਜਾਂਦੀ ਹੈ, ਜਿਸ ’ਚ ਪੜ੍ਹਨ ਲਈ ਕਿਤਾਬਾਂ, ਪੀਣ ਲਈ ਪਾਣੀ ਤੇ ਬੈਂਚ ਸੈਟਿੰਗ ਵਧੀਆ ਤਰੀਕੇ ਨਾਲ ਮੁਹੱਈਆ ਕਰਵਾਈ ਜਾਂਦੀ ਹੈ। ਉਨਾਂ ਕਿਹਾ ਕਿ ਲਾਇਬ੍ਰੇਰੀ ਦਿਨ ’ਚ 12 ਘੰਟੇ ਖੁੱਲ੍ਹੀ ਰਹਿੰਦੀ ਹੈ, ਜਿਸ ਕਰਕੇ ਪੜ੍ਹਨ ਲਈ ਸਾਰਾ ਦਿਨ ਮਿਲਦਾ ਰਹਿੰਦਾ ਹੈ। ਉਨਾਂ ਕਿਹਾ ਕਿ ਲਾਇਬ੍ਰੇਰੀ ’ਚ ਪੜ੍ਹਨ ਲਈ ਕਿਤਾਬਾਂ ਤੇ ਇੰਟਰਨੈਟ ਦੀ ਸਹੂਲਤ ਮਿਲਦੀ ਹੈ। ਇਸ ਲਾਇਬ੍ਰੇਰੀ ’ਚ ਹਰ ਭਾਸ਼ਾ ’ਚ ਅਖਬਾਰ ਮਿਲਦੇ ਹਨ। ਜੇਕਰ ਲਾਇਬ੍ਰੇਰੀ ’ਚ ਕਿਤਾਬ ਨਹੀਂ ਹੁੰਦੀ ਤਾਂ ਉਸ ਨੂੰ ਲਾਈਬ੍ਰੇਰੀਅਨ ਦੇ ਜ਼ਰੀਏ ਮੁਹੱਈਆ ਕਰਵਾਈ ਜਾਂਦੀ ਹੈ। ਉਨਾਂ ਕਿਹਾ ਕਿ ਲਾਈਬ੍ਰੇਰੀ ’ਚ ਤਜ਼ਰਬੇਕਾਰ ਵਿਦਿਆਰਥੀ ਆਉਂਦੇ ਹਨ, ਜਿੰਨਾਂ ਤੋਂ ਸੇਧ ਮਿਲਦੀ ਹੈ।