ਭਦੌੜ ਹਸਪਤਾਲ ‘ਚ ਡਾਕਟਰਾਂ ਦੀ ਘਾਟ ਕਾਰਨ ਰਾਤ ਨੂੰ ਐਮਰਜੈਂਸੀ ਸੇਵਾਵਾਂ ਠੱਪ

– ਐੱਸ.ਐੱਮ.ਓ ਸਮੇਤ 6 ਅਸਾਮੀਆਂ: ਸਿਰਫ਼ 2 ਡਾਕਟਰ ਤਾਇਨਾਤ
ਬਰਨਾਲਾ, 9 ਜੂਨ (ਰਵਿੰਦਰ ਸ਼ਰਮਾ) : 25 ਹਜ਼ਾਰ ਦੀ ਆਬਾਦੀ ਵਾਲੇ ਭਦੌੜ ਅਤੇ ਆਸ-ਪਾਸ ਦੇ ਕਰੀਬ 30 ਪਿੰਡਾਂ ਦੀ ਆਬਾਦੀ ਨੂੰ ਮਿਲਾ ਕੇ ਕਰੀਬ 80 ਹਜ਼ਾਰ ਲੋਕਾਂ ਵਿੱਚੋਂ ਜੇਕਰ ਕਿਸੇ ਨੂੰ ਰਾਤ ਦੇ ਸਮੇਂ ਐਮਰਜੈਂਸੀ ਸਿਹਤ ਸੇਵਾਵਾਂ ਦੀ ਲੋੜ ਪਵੇ ਤਾਂ ਸਿਵਲ ਹਸਪਤਾਲ ਭਦੌੜ ਵਿੱਚ ਇਸਦੇ ਇੰਤਜ਼ਾਮ ਨਹੀਂ ਹਨ। ਇੱਥੇ ਰਾਤ ਦੇ ਸਮੇਂ ਐਮਰਜੈਂਸੀ ਸੇਵਾਵਾਂ ਠੱਪ ਹੋ ਜਾਂਦੀਆਂ ਹਨ। ਇਸਦਾ ਸਭ ਤੋਂ ਵੱਡਾ ਕਾਰਨ ਡਾਕਟਰਾਂ ਦੀ ਘਾਟ ਹੈ। ਇੱਥੇ ਐੱਸਐੱਮਓ ਸਮੇਤ ਡਾਕਟਰਾਂ ਦੀਆਂ 6 ਅਸਾਮੀਆਂ ਮਨਜ਼ੂਰ ਹਨ ਅਤੇ ਇਨ੍ਹਾਂ ਵਿੱਚੋਂ ਕੇਵਲ ਦੋ ਡਾਕਟਰ ਤਾਇਨਾਤ ਹਨ। ਉਹ ਵੀ ਦਿਨ ਦੇ ਸਮੇਂ ਡਿਊਟੀ ‘ਤੇ ਆਉਂਦੇ ਹਨ। ਲੋਕਾਂ ਦਾ ਕਹਿਣਾ ਹੈ ਕਿ ਰਾਤ ਦੇ ਸਮੇਂ ਜੇਕਰ ਕਿਸੇ ਨੂੰ ਕੋਈ ਐਮਰਜੈਂਸੀ ਹੋਵੇ ਤਾਂ ਉਸਨੂੰ ਜਾਂ ਤਾਂ ਦੂਜੇ ਸ਼ਹਿਰ ਜਾਣਾ ਪੈਂਦਾ ਹੈ ਜਾਂ ਕਿਸੇ ਪ੍ਰਾਈਵੇਟ ਹਸਪਤਾਲ ਦਾ ਸਹਾਰਾ ਲੈਣਾ ਪੈਂਦਾ ਹੈ। ਕਈ ਵਾਰ ਮੰਗ ਉਠਾਏ ਜਾਣ ਦੇ ਬਾਵਜੂਦ ਹਸਪਤਾਲ ਵਿੱਚ ਡਾਕਟਰਾਂ ਦੀ ਗਿਣਤੀ ਨਹੀਂ ਵਧਾਈ ਜਾ ਰਹੀ। ਸਿਵਲ ਹਸਪਤਾਲ ਭਦੌੜ ਦਾ ਐਮਰਜੈਂਸੀ ਵਾਰਡ ਸਿਰਫ਼ ਕਹਿਣ ਲਈ 24 ਘੰਟੇ ਸੇਵਾਵਾਂ ਦਿੰਦਾ ਹੈ, ਪਰ ਹਾਲਾਤ ਅਜਿਹੇ ਹਨ ਕਿ ਰਾਤ ਦੇ ਸਮੇਂ ਮੈਡੀਕਲ ਐਮਰਜੈਂਸੀ, ਕਿਸੇ ਹਾਦਸੇ ਜਾਂ ਹੋਰ ਇਲਾਜ ਲਈ ਡਾਕਟਰ ਉਪਲਬਧ ਨਹੀਂ ਹੁੰਦੇ। ਰਾਤ ਦੇ ਸਮੇਂ ਕਲਾਸ ਫੋਰ ਵਰਕਰ ਜਾਂ ਕਈ ਵਾਰ ਸਟਾਫ ਨਰਸ ਹੀ ਤਾਇਨਾਤ ਰਹਿੰਦੀਆਂ ਹਨ।
– ਇੱਕ ਐਮਬੀਬੀਐਸ ਅਤੇ ਇੱਕ ਐਮਡੀ ਮੈਡੀਸਨ ਡਾਕਟਰ ਦੇ ਰਹੇ ਸੇਵਾਵਾਂ
ਸਿਵਲ ਹਸਪਤਾਲ ਭਦੌੜ ਵਿੱਚ ਇੱਕ ਐਸਐਮਓ, ਇੱਕ ਐਮਡੀ ਮੈਡੀਸਨ, ਇੱਕ ਐਮਡੀ ਗਾਇਨੀ, ਇੱਕ ਐਮਡੀ ਸਰਜਰੀ ਅਤੇ ਦੋ ਐਮਬੀਬੀਐਸ ਡਾਕਟਰਾਂ ਦੇ ਅਹੁਦੇ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਐਮਡੀ ਮੈਡੀਸਨ ਡਾ. ਬਾਂਕੇ ਬਿਹਾਰੀ ਅਤੇ ਇੱਕ ਐਮਬੀਬੀਐਸ ਡਾ. ਸਬਦੀਪ ਸਿੰਘ ਹੀ ਡਿਊਟੀ ‘ਤੇ ਤਾਇਨਾਤ ਹਨ। ਐਸਐਮਓ ਦੀ ਪੋਸਟ ਖਾਲੀ ਹੈ। ਇਸਦਾ ਵਾਧੂ ਚਾਰਜ ਐਸਐਮਓ ਤਪਾ ਡਾ. ਇੰਦੂ ਕੋਲ ਹੈ। ਉਥੇ ਹੀ ਗਾਇਨੀ, ਐਮਡੀ ਸਰਜਰੀ ਅਤੇ ਐਮਬੀਬੀਐਸ ਦੇ ਅਹੁਦੇ ਖਾਲੀ ਹਨ।
– ਰੋਜ਼ਾਨਾ 150 ਤੱਕ ਦੀ ਓਪੀਡੀ ਹੁੰਦੀ ਹੈ ਸਿਵਲ ਹਸਪਤਾਲ ਵਿੱਚ
ਹਸਪਤਾਲ ਵਿੱਚ ਤਾਇਨਾਤ ਡਾ. ਬਾਂਕੇ ਬਿਹਾਰੀ ਨੇ ਕਿਹਾ ਕਿ ਦਿਨ ਦੇ ਸਮੇਂ ਸਵੇਰੇ 9 ਵਜੇ ਤੋਂ ਦੁਪਹਿਰ 2 ਵਜੇ ਤੱਕ ਡਿਊਟੀ ਕਰਦੇ ਹਨ। ਕਈ ਵਾਰ ਉਨ੍ਹਾਂ ਨੂੰ ਇਸ ਤੋਂ ਵੱਧ ਕੰਮ ਵੀ ਕਰਨਾ ਪੈਂਦਾ ਹੈ। ਜਿਸ ਕਾਰਨ ਰਾਤ ਦੇ ਸਮੇਂ ਉਹ ਡਿਊਟੀ ਨਹੀਂ ਦੇ ਸਕਦੇ। ਜੇਕਰ ਸਾਰੇ ਅਹੁਦੇ ਭਰੇ ਹੋਣ ਤਾਂ ਐਮਰਜੈਂਸੀ ਸੇਵਾਵਾਂ ਪ੍ਰਭਾਵਿਤ ਨਾ ਹੋਣ। ਦਿਨ ਦੇ ਸਮੇਂ ਸਿਵਲ ਹਸਪਤਾਲ ਵਿੱਚ 100 ਤੋਂ 150 ਦੀ ਓਪੀਡੀ ਹੁੰਦੀ ਹੈ। ਹਫ਼ਤੇ ਵਿੱਚ ਇੱਕ ਦਿਨ ਗਾਇਨੀ ਡਾਕਟਰ ਵੀ ਆਉਂਦੇ ਹਨ। ਉਸ ਦਿਨ ਓਪੀਡੀ ਕਰੀਬ 250 ਤੱਕ ਹੋ ਜਾਂਦੀ ਹੈ। ਜੇਕਰ ਰਾਤ ਦੇ ਸਮੇਂ ਡਾਕਟਰ ਹੋਣ ਤਾਂ ਲੋਕਾਂ ਨੂੰ ਅਸੁਵਿਧਾ ਨਾ ਹੋਵੇ।
– ਸਰਕਾਰ ਨੂੰ ਲਿਖਿਆ ਹੈ, ਕਮੀ ਹੋਵੇਗੀ ਦੂਰ: ਸਿਵਲ ਸਰਜਨ
ਸਿਵਲ ਸਰਜਨ ਡਾ. ਬਲਜੀਤ ਸਿੰਘ ਨੇ ਕਿਹਾ ਕਿ ਡਾਕਟਰਾਂ ਦੀ ਘਾਟ ਨੂੰ ਜਲਦ ਦੂਰ ਕੀਤਾ ਜਾਵੇਗਾ। ਇਸ ਬਾਰੇ ਸਰਕਾਰ ਨੂੰ ਲਿਖ ਕੇ ਭੇਜਿਆ ਹੈ। ਐਮਰਜੈਂਸੀ ਸੇਵਾਵਾਂ ਵਿੱਚ ਜਲਦ ਸੁਧਾਰ ਕੀਤਾ ਜਾਵੇਗਾ। ਸਿਵਲ ਹਸਪਤਾਲ ਤਪਾ ਤੋਂ ਹਫ਼ਤੇ ਵਿੱਚ ਇੱਕ ਵਾਰ ਗਾਇਨੀ ਡਾਕਟਰ ਨੂੰ ਭਦੌੜ ਵਿੱਚ ਭੇਜਿਆ ਜਾਂਦਾ ਹੈ। ਸਾਰੀ ਕਮੀ ਜਲਦ ਦੂਰ ਕਰ ਦਿੱਤੀ ਜਾਵੇਗੀ।