ਹੰਡਿਆਇਆ ’ਚ ਵੀ ਮੀਂਹ ਦਾ ਕਹਿਰ, ਇਕ ਹੋਰ ਗਰੀਬ ਪਰਿਵਾਰ ਦੇ ਘਰ ਦੀ ਡਿੱਗੀ ਛੱਤ

ਹੰਡਿਆਇਆ, 5 ਸਤੰਬਰ (ਰਵਿੰਦਰ ਸ਼ਰਮਾ) : ਭਾਰੀ ਮੀਹ ਕਾਰਨ ਹੰਡਿਆਇਆ ਅਧੀਨ ਆਉਂਦੀ ਬੀਕਾ ਸੂਚ ਪੱਤੀ ਦੇ ਰਹਿਣ ਵਾਲੇ ਗਰੀਬ ਪਰਿਵਾਰ ਨਾਲ ਸਬੰਧਿਤ ਨਿੱਕਾ ਸਿੰਘ ਪੁੱਤਰ ਗੰਢਾ ਸਿੰਘ ਦੇ ਘਰ ਦੇ ਕਮਰੇ ਤੇ ਬਰਾਂਡੇ ਦੀ ਛੱਤ ਡਿੱਗਣ ਨਾਲ ਲੱਖਾਂ ਰੁਪਏ ਦਾ ਨੁਕਸਾਨ ਹੋ ਗਿਆ। ਇਸ ਮੌਕੇ ਉਨ੍ਹਾਂ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਪਿਛਲੇ ਕਈ ਦਿਨਾਂ ਤੋਂ ਉਨ੍ਹਾਂ ਦੇ ਘਰ ਦੀਆਂ ਛੱਤਾਂ ਚੋਅ ਰਹੀਆਂ ਸਨ। ਤਰਪਾਲ ਪਾਕੇ ਹੱਲ ਵੀ ਕੀਤਾ ਗਿਆ ਸੀ। ਪਰ ਜ਼ਿਆਦਾ ਮੀਂਹ ਹੋਣ ਕਾਰਨ ਘਰ ਦੀਆਂ ਛੱਤਾਂ ਡਿੱਗ ਗਈਆਂ। ਛੱਤਾਂ ਉਸ ਸਮੇਂ ਡਿੱਗੀਆਂ ਜਦ ਘਰ ’ਚ ਪਰਿਵਾਰ ਦੂਜੇ ਕਮਰੇ ’ਚ ਮੌਜੂਦ ਸੀ। ਉਨ੍ਹਾਂ ਕਮਰੇ ’ਚੋਂ ਭੱਜਕੇ ਆਪਣੀ ਜਾਨ ਬਚਾਈ। ਜਿੱਥੇ ਇੱਕੋ ਦਮ ਕਮਰੇ ਦੀ ਛੱਤ ਤੇ ਬਰਾਂਡੇ ਦੀ ਛੱਤ ਡਿੱਗ ਗਈ। ਛੱਤਾਂ ਡਿੱਗਣ ਨਾਲ ਜਾਨੀ ਨੁਕਸਾਨ ਹੋਣੋਂ ਤਾਂ ਬਚਾਅ ਰਿਹਾ, ਪਰ ਕਮਰੇ ’ਚ ਪਿਆ ਬੈਡ, ਫਰਨੀਚਰ, ਕੁਰਸੀਆਂ, ਟੇਬਲ ਟੈਲੀਵਿਜ਼ਨ ਸਮੇਤ ਕਾਫੀ ਸਾਮਾਨ ਨੁਕਸਾਨਿਆ ਗਿਆ। ਛੱਤ ਡਿੱਗਣ ਨਾਲ ਕੁੱਲ 3 ਲੱਖ ਰੁਪਏ ਦੇ ਕਰੀਬ ਨੁਕਸਾਨ ਹੋ ਗਿਆ। ਉਨ੍ਹਾਂ ਪੰਜਾਬ ਸਰਕਾਰ ਤੋਂ ਆਰਥਿਕ ਮੁਆਵਜੇ ਦੀ ਮੰਗ ਕਰਦਿਆਂ ਕਿਹਾ ਕਿ ਉਹ ਗਰੀਬ ਪਰਿਵਾਰ ਨਾਲ ਸੰਬੰਧ ਰੱਖਦਾ ਹੈ ਤੇ ਮਿਹਨਤ ਮਜ਼ਦੂਰੀ ਨਾਲ ਘਰ ਬਣਾਇਆ ਸੀ। ਪਰ ਮੀਂਹ ਕਾਰਨ ਘਰ ਦੀਆਂ ਛੱਤਾਂ ਡਿੱਗਣ ਨਾਲ ਲੱਖਾਂ ਦਾ ਨੁਕਸਾਨ ਹੋ ਗਿਆ। ਦੂਜੇ ਪਾਸੇ ਪ੍ਰਸ਼ਾਸਨ ਵੱਲੋਂ ਵੀ ਸਾਰੇ ਬਰਨਾਲਾ ਅੰਦਰ ਮੀਂਹ ਨਾਲ ਪ੍ਰਭਾਵਿਤ ਇਲਾਕਿਆਂ ਦਾ ਜਾਇਜ਼ਾ ਲਿਆ ਜਾ ਰਿਹਾ ਹੈ। ਇਸ ਮੌਕੇ ਨਿੱਕਾ ਸਿੰਘ, ਅਮਰਜੀਤ ਕੌਰ, ਸੁਖਵਿੰਦਰ ਸਿੰਘ, ਗੁਰਲਾਲ ਸਿੰਘ ਸਮੇਤ ਪਰਿਵਾਰਿਕ ਮੈਂਬਰ ਤੇ ਮੁਹੱਲਾ ਵਾਸੀ ਹਾਜ਼ਰ ਸਨ।