ਬਰਨਾਲਾ, 10 ਸਤੰਬਰ (ਰਵਿੰਦਰ ਸ਼ਰਮਾ) : ਜ਼ਿਲ੍ਹਾ ਬਰਨਾਲਾ ਦੇ ਵਿਧਾਨ ਸਭਾ ਹਲਕਾ ਭਦੌੜ ਦੇ ਪ੍ਰਸਿੱਧ ਪੰਜਾਬੀ ਗਾਇਕ ਅਰਜੁਨ ਢਿੱਲੋਂ ਵੱਲੋਂ ਹੜ੍ਹ ਪੀੜਤਾਂ ਨੂੰ ਲਗਾਤਾਰ ਵਿੱਤੀ ਸਹਾਇਤਾ ਪ੍ਰਦਾਨ ਕੀਤੀ ਜਾ ਰਹੀ ਹੈ। ਮੰਗਲਵਾਰ ਨੂੰ ਉਨ੍ਹਾਂ ਨੇ ਭਦੌੜ ਸ਼ਹਿਰ ਦੇ ਉਨ੍ਹਾਂ ਹੜ੍ਹ ਪ੍ਰਭਾਵਿਤ ਪਰਿਵਾਰਾਂ ਨੂੰ 5 ਲੱਖ ਰੁਪਏ ਦੀ ਪਹਿਲੀ ਕਿਸ਼ਤ ਦੇਣ ਦਾ ਐਲਾਨ ਕੀਤਾ ਹੈ ਜਿਨ੍ਹਾਂ ਦੇ ਘਰ ਖਸਤਾ ਹਾਲਤ ਕਾਰਨ ਡਿੱਗ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਕੁਝ ਦਿਨ ਪਹਿਲਾਂ ਗਾਇਕ ਅਰਜੁਨ ਢਿੱਲੋਂ ਨੇ ਭਦੌੜ ਸ਼ਹਿਰ ਤੋਂ 400 ਕੁਇੰਟਲ ਮੱਕੀ ਦਾ ਅਚਾਰ ਫ਼ਾਜ਼ਿਲਕਾ ਅਤੇ ਅਜਨਾਲਾ ਨੂੰ ਹੜ੍ਹ ਪੀੜਤਾਂ ਦੇ ਜਾਨਵਰਾਂ ਲਈ ਭੇਜਿਆ ਸੀ। ਅਰਜੁਨ ਢਿੱਲੋਂ ਵੱਲੋਂ ਹੜ੍ਹ ਪੀੜਤਾਂ ਦੀ ਮਦਦ ਲਈ ਚੁੱਕੇ ਜਾ ਰਹੇ ਕਦਮਾਂ ਦੀ ਪੰਜਾਬੀਆਂ ਵੱਲੋਂ ਸ਼ਲਾਘਾ ਕੀਤੀ ਜਾ ਰਹੀ ਹੈ ਅਤੇ ਭਦੌੜ ਸ਼ਹਿਰ ਦੇ ਲੋਕ ਅਰਜੁਨ ਢਿੱਲੋਂ ਦੇ ਅਜਿਹੇ ਸਮਾਜਿਕ ਕਾਰਜਾਂ ‘ਤੇ ਮਾਣ ਮਹਿਸੂਸ ਕਰ ਰਹੇ ਹਨ। ਪ੍ਰਸਿੱਧ ਗਾਇਕ ਅਰਜੁਨ ਢਿੱਲੋਂ ਦੇ ਕਰੀਬੀ ਦੋਸਤ ਡੇਵਿਡ ਸਿੰਗਲਾ (ਡੇਵੀ) ਨੇ ਕਿਹਾ ਕਿ ਸਾਡੇ ਕਰੀਬੀ ਦੋਸਤ ਵਿਕਰਾਂਤ ਬਾਂਸਲ ਅਤੇ ਪੂਰੀ ਟੀਮ ਹੜ੍ਹ ਪ੍ਰਭਾਵਿਤ ਘਰਾਂ ਦਾ ਦੌਰਾ ਕਰ ਰਹੀ ਹੈ ਅਤੇ ਲੋੜ ਅਨੁਸਾਰ ਹਰੇਕ ਲੋੜਵੰਦ ਘਰ ਨੂੰ ਵਿੱਤੀ ਸਹਾਇਤਾ ਪ੍ਰਦਾਨ ਕੀਤੀ ਜਾ ਰਹੀ ਹੈ।
