ਸਵਦੇਸ਼ੀ ਅਪਣਾਓ, ਕਾਰੀਗਰਾਂ ਦਾ ਮਾਣ ਵਧਾਓ, ਸ਼ਿਵ ਸਿੰਗਲਾ ਨੇ ਕੀਤੀ ਦੀਵਾਲੀ ‘ਤੇ ਮਿੱਟੀ ਦੇ ਦੀਵੇ ਖਰੀਦਣ ਦੀ ਅਪੀਲ
ਬਰਨਾਲਾ, 22 ਅਕਤੂਬਰ (ਰਵਿੰਦਰ ਸ਼ਰਮਾ) : ਦੀਵਾਲੀ ਦਾ ਤਿਉਹਾਰ ਨੇੜੇ ਆਉਂਦਿਆਂ ਹੀ ਬਾਜ਼ਾਰ ਸੱਜ ਗਏ ਹਨ, ਪਰ ਇਸ ਵਾਰ ਬਰਨਾਲਾ ਵਿੱਚ ਇੱਕ ਵੱਖਰੀ ਹੀ ਮੁਹਿੰਮ ਨੇ ਜ਼ੋਰ ਫੜਿਆ ਹੈ। ਟੰਡਨ ਇੰਟਰਨੈਸ਼ਨਲ ਸਕੂਲ ਦੇ ਡਾਇਰੈਕਟਰ ਸ਼ਿਵ ਸਿੰਗਲਾ ਨੇ ਸ਼ਹਿਰ ਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਇਸ ਦੀਵਾਲੀ ਚੀਨੀ ਝਾਲਰਾਂ ਅਤੇ ਮਹਿੰਗੀਆਂ ਸਜਾਵਟੀ ਲਾਈਟਾਂ ਨੂੰ ਛੱਡ ਕੇ ਆਪਣੇ ਹੀ ਸ਼ਹਿਰ ਦੇ ਕਾਰੀਗਰਾਂ ਦੇ ਬਣਾਏ ਮਿੱਟੀ ਦੇ ਦੀਵੇ ਖਰੀਦਣ।
ਸ਼ਿਵ ਸਿੰਗਲਾ ਨੇ ਕਿਹਾ ਕਿ ਇੱਕ ਮਿੱਟੀ ਦਾ ਦੀਵਾ ਸਿਰਫ ਦੀਵਾ ਨਹੀਂ, ਸਗੋਂ ਇੱਕ ਗਰੀਬ ਕਾਰੀਗਰ ਪਰਿਵਾਰ ਦੀ ਮਿਹਨਤ, ਉਮੀਦ ਅਤੇ ਰੋਜ਼ੀ-ਰੋਟੀ ਹੈ। ਇਹ ਕਾਰੀਗਰ ਮਹੀਨਿਆਂ ਪਹਿਲਾਂ ਤੋਂ ਮਿੱਟੀ ਪੁੱਟਣ, ਗੁੰਨਣ, ਦੀਵਾ ਬਣਾਉਣ, ਸੁਕਾਉਣ ਅਤੇ ਅੱਗ ਵਿੱਚ ਪਕਾਉਣ ਦੀ ਸਖਤ ਮਿਹਨਤ ਕਰਦੇ ਹਨ, ਪਰ ਬਾਜ਼ਾਰ ਵਿੱਚ ਸਸਤੇ ਚੀਨੀ ਸਮਾਨ ਕਾਰਨ ਉਨ੍ਹਾਂ ਦੀ ਮਿਹਨਤ ਦਾ ਮੁੱਲ ਨਹੀਂ ਮਿਲਦਾ। ਉਨ੍ਹਾਂ ਕਿਹਾ ਕਿ ਜਦੋਂ ਤੁਸੀਂ ਇੱਕ ਕਾਰੀਗਰ ਤੋਂ 100 ਦੀਵੇ ਖਰੀਦਦੇ ਹੋ ਤਾਂ ਉਸਦਾ ਸਿੱਧਾ ਫਾਇਦਾ ਉਸਦੇ ਬੱਚਿਆਂ ਦੀ ਫੀਸ, ਘਰ ਦਾ ਰਾਸ਼ਨ ਅਤੇ ਤਿਉਹਾਰ ਦੀ ਖੁਸ਼ੀ ਬਣ ਕੇ ਉਸਦੇ ਘਰ ਪਹੁੰਚਦਾ ਹੈ। ਬਿਜਲੀ ਦੀਆਂ ਲਾਈਟਾਂ ਸਹੂਲਤ ਹਨ, ਪਰ ਮਿੱਟੀ ਦੇ ਦੀਵਿਆਂ ਵਿੱਚ ਸਾਡੀ ਸਦੀਆਂ ਪੁਰਾਣੀ ਸੰਸਕ੍ਰਿਤੀ, ਵਿਰਾਸਤ ਅਤੇ ਸਕੂਨ ਵਸਦਾ ਹੈ।
ਉਨ੍ਹਾਂ ਕਿਹਾ ਕਿ ਦੀਵਾਲੀ ਹਨੇਰੇ ‘ਤੇ ਚਾਨਣ ਦੀ ਜਿੱਤ ਦਾ ਪ੍ਰਤੀਕ ਹੈ, ਤਾਂ ਇਸ ਜਿੱਤ ਨੂੰ ਸਾਰਥਕ ਤਾਂ ਹੀ ਬਣਾਵਾਂਗੇ ਜਦੋਂ ਸਾਡੇ ਨਾਲ ਨਾਲ ਉਨ੍ਹਾਂ ਮਿਹਨਤੀ ਹੱਥਾਂ ਦੇ ਘਰ ਵੀ ਰੌਸ਼ਨ ਹੋਣ ਜੋ ਸਾਡੇ ਲਈ ਦੀਵੇ ਬਣਾਉਂਦੇ ਹਨ। ਮਿੱਟੀ ਦਾ ਦੀਵਾ ਖਰੀਦਣਾ ਸਿਰਫ ਖਰੀਦਦਾਰੀ ਨਹੀਂ, ਇਹ ਸਮਾਜ ਪ੍ਰਤੀ ਸਾਡੀ ਜ਼ਿੰਮੇਵਾਰੀ ਅਤੇ ਸੱਚੀ ਮਨੁੱਖਤਾ ਹੈ।
