ਸਕੂਲਾਂ ਵਿੱਚ 25 ਹਜਾਰ ਨੀਂਹ ਪੱਥਰ ਲਾਕੇ ਸਿੱਖਿਆ ਪ੍ਰਣਾਲੀ ਵਿੱਚ ਕ੍ਰਾਂਤੀ ਨਹੀਂ ਲਿਆਂਦੀ ਜਾ ਸਕਦੀ – ਇੰਜ. ਸਿੱਧੂ

ਬਰਨਾਲਾ, 13 ਅਪ੍ਰੈਲ (ਰਵਿੰਦਰ ਸ਼ਰਮਾ) : ਪੰਜਾਬ ਸਕੂਲ ਸਿੱਖਿਆ ਬੋਰਡ ਦੇ ਸਕੂਲਾਂ ਵਿੱਚ 44 ਪ੍ਰਤੀਸ਼ਤ ਸੀਨੀਅਰ ਸੈਕੰਡਰੀ ਸਕੂਲਾਂ ਦੇ ਪ੍ਰਿੰਸੀਪਲ ਅਤੇ 47 ਪ੍ਰਤੀਸ਼ਤ ਹਾਈ ਸਕੂਲਾਂ ਦੇ ਹੈੱਡ ਮਾਸਟਰਾ ਦੀ ਘਾਟ ਹੈ ਅਤੇ ਸਕੂਲਾਂ ਵਿੱਚ ਹਜਾਰਾਂ ਆਮ ਅਧਿਆਪਕਾਂ ਦੀ ਵੱਡੀ ਘਾਟ ਹੈ ਪਰ ਪੰਜਾਬ ਸਰਕਾਰ 12.5 ਕਰੋੜ ਦਾ ਵਾਧੂ ਬੋਝ ਖਜਾਨੇ ’ਤੇ ਪਾਕੇ 25000 ਹਜਾਰ ਨੀਂਹ ਪੱਥਰ ਰੱਖਕੇ ਸਕੂਲਾਂ ਵਿੱਚ ਸਿੱਖਿਆ ਕ੍ਰਾਂਤੀ ਦੇ ਨਾਂ ’ਤੇ ਸਸਤੀ ਰਾਜਨੀਤੀ ਕਰ ਰਹੀ ਹੈ। ਇਹ ਵਿਚਾਰ ਪ੍ਰਗਟ ਕਰਦਿਆਂ ਭਾਜਪਾ ਦੇ ਸੀਨੀਅਰ ਆਗੂ ਅਤੇ ਹਲਕਾ ਭਦੌੜ ਦੇ ਇੰਚਾਰਜ਼ ਇੰਜ. ਗੁਰਜਿੰਦਰ ਸਿੰਘ ਸਿੱਧੂ ਨੇ ਮੌਜੂਦਾ ਸਰਕਾਰ ਨੂੰ ਸਵਾਲ ਕੀਤਾ ਕੀ 25 ਹਜਾਰ ਨੀਂਹ ਪੱਥਰ ਬੱਚਿਆ ਨੂੰ ਪੜ੍ਹਾਉਣਗੇ ਅਤੇ ਸਿੱਖਿਆ ਕ੍ਰਾਂਤੀ ਲਿਆਉਣਗੇ ? ਸਿੱਧੂ ਨੇ ਕਿਹਾ ਤਿੰਨ ਤਿੰਨ ਸਾਲ ਪੁਰਾਣੇ ਕਮਰੇ ਬਾਥਰੂਮ ਤੇ ਪੁਰਾਣੀਆਂ ਚਾਰ ਦੀਵਾਰੀਆ ਨੂੰ ਥੋੜਾ ਬਹੁਤਾ ਠੀਕ ਕਰਵਾ ਕੇ ਨੀਂਹ ਪੱਥਰ ਲਾਕੇ ਸਿੱਖਿਆ ਕ੍ਰਾਂਤੀ ਕਿਹੜੇ ਹਿਸਾਬ ਨਾਲ ਆਵੇਗੀ। ਉਨ੍ਹਾਂ ਪੰਜਾਬ ਸਰਕਾਰ ਤੋਂ ਪੁਰਜ਼ੋਰ ਮੰਗ ਕੀਤੀ ਕਿ ਵਿਦਿਅਕ ਅਦਾਰਿਆ ਦਾ ਸਿਆਸੀਕਰਨ ਨਾ ਕੀਤਾ ਜਾਵੇ, ਸਗੋਂ ਇਹੀ ਪੈਸਾ ਨਵੇਂ ਟੀਚਰ ਭਰਤੀ ਕਰਕੇ ਬੇਰੁਜਗਾਰ ਨੌਜਵਾਨ ਮੁੰਡੇ ਕੁੜੀਆਂ ਨੂੰ ਰੋਜ਼ਗਾਰ ਦਿੱਤਾ ਜਾਵੇ ਤਾਂ ਜੋ ਨੌਜਵਾਨ ਨਸ਼ਿਆਂ ਦੀ ਦਲਦਲ ਵਿੱਚ ਨਾ ਫਸਣ ਤੇ ਅਜਿਹਾ ਕਰਨ ਨਾਲ ਹੀ ਅਸਲ ਸਿੱਖਿਆ ਕ੍ਰਾਂਤੀ ਆਵੇਗੀ ਨਾ ਕੇ ਨੀਂਹ ਪਥਰਾ ਨਾਲ। ਸਿੱਧੂ ਨੇ ਪੰਜਾਬ ਸਰਕਾਰ ਨੂੰ ਸੱਚੀ ਸੁੱਚੀ ਸਿੱਖਿਆ ਕ੍ਰਾਂਤੀ ਲਿਆਉਣ ਲਈ ਜੋਰ ਦਿੱਤਾ ਤਾਂ ਜੋ ਪੰਜਾਬ ਦੇ ਬੱਚੇ ਇਕ ਚੰਗੇ ਤੇ ਕਾਮਯਾਬ ਨਾਗਰਿਕ ਬਣ ਸਕਣ।