ਛੋਟੇ ਦੁਕਾਨਦਾਰਾਂ ਲਈ ਸਰਕਾਰ ਦਾ ਵੱਡਾ ਫੈਸਲਾ, ਓਵਰ ਟਾਈਮ ਕੰਮ ਦੇ ਮਿਲਣਗੇ ਦੁੱਗਣੇ ਪੈਸੇ

ਚੰਡੀਗੜ੍ਹ, 4 ਜੂਨ (ਰਵਿੰਦਰ ਸ਼ਰਮਾ) : ਪੰਜਾਬ ਸਰਕਾਰ ਵੱਲੋਂ ਕੈਬਨਿਟ ਮੀਟਿੰਗ ਦੌਰਾਨ ਅਹਿਮ ਫੈਸਲਾ ਲਿਆ ਗਿਆ ਹੈ। ਦਰਅਸਲ ਸਰਕਾਰ ਮੁਤਾਬਕ ਇਸ ਫੈਸਲੇ ਨਾਲ ਛੋਟੇ ਦੁਕਾਨਦਾਰਾਂ ਨੂੰ ਵੱਡਾ ਫਾਇਦਾ ਹੋਵੇਗਾ। ਪੰਜਾਬ ਸਰਕਾਰ ਨੇ ਪੰਜਾਬ ਦੁਕਾਨ ਅਤੇ ਵਪਾਰਕ ਐਕਟ ਵਿੱਚ ਸੋਧ ਕੀਤੀ ਹੈ। ਇਹ ਜਾਣਕਾਰੀ ਕੈਬਨਿਟ ਮੀਟਿੰਗ ਤੋਂ ਬਾਅਦ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਮੀਡੀਆ ਨੂੰ ਦਿੱਤੀ। ਉਨ੍ਹਾਂ ਕਿਹਾ ਕਿ ਇਸ ਸੋਧ ਨਾਲ ਦੁਕਾਨਦਾਰਾਂ ਨੂੰ ਇੰਸਪੈਕਟਰ ਰਾਜ ਤੋਂ ਮੁਕਤੀ ਮਿਲੇਗੀ।

– ਪੰਜਾਬ ਦੁਕਾਨ ਅਤੇ ਵਪਾਰਕ ਐਕਟ ਵਿੱਚ ਸੋਧ

ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਕਿਹਾ ਕਿ “ਹੁਣ ਦੁਕਾਨਦਾਰਾਂ ਨੂੰ 20 ਸਹਾਇਕ ਰੱਖਣ ਲਈ ਕੋਈ ਹਿਸਾਬ ਨਹੀਂ ਦੇਣਾ ਪਵੇਗਾ। 6 ਮਹੀਨਿਆਂ ਵਿੱਚ ਸਿਰਫ਼ ਇੱਕ ਵਾਰ ਜਾਣਕਾਰੀ ਦੇਣੀ ਪਵੇਗੀ। 20 ਤੋਂ ਵੱਧ ਕਰਮਚਾਰੀ ਰੱਖਣ ਲਈ ਹਰੇਕ ਦਾ ਖਾਤਾ ਰੱਖਣਾ ਹੋਵੇਗਾ ਅਤੇ ਰਜਿਸਟ੍ਰੇਸ਼ਨ ਕਰਨੀ ਪਵੇਗੀ। ਇਸ ਸ਼੍ਰੇਣੀ ਵਿੱਚ ਲਗਭਗ 5 ਪ੍ਰਤੀਸ਼ਤ ਲੋਕਾਂ ਨੂੰ ਸ਼ਾਮਲ ਕੀਤਾ ਜਾਵੇਗਾ। ਇਸ ਦੇ ਨਾਲ ਹੀ ਕਰਮਚਾਰੀਆਂ ਦੀ ਤਨਖਾਹ ਵੀ ਵਧਾਉਣੀ ਪਵੇਗੀ। ਇਸ ਸਬੰਧੀ ਆਉਣ ਵਾਲੇ ਦਿਨਾਂ ਵਿੱਚ ਵਿਧਾਨ ਸਭਾ ਵਿੱਚ ਇੱਕ ਪ੍ਰਸਤਾਵ ਲਿਆਂਦਾ ਜਾਵੇਗਾ। ਇਸ ਤੋਂ ਇਲਾਵਾ ਇਸ ਮੁੱਦੇ ‘ਤੇ ਸਾਰੇ ਮਾਹਿਰਾਂ ਤੋਂ ਰਾਏ ਲਈ ਜਾਵੇਗੀ। ਹਾਲਾਂਕਿ, ਉਨ੍ਹਾਂ ਕਿਹਾ ਕਿ ਕਿਰਤ ਕਾਨੂੰਨ ਪਹਿਲਾਂ ਵਾਂਗ ਹੀ ਜਾਰੀ ਰਹਿਣਗੇ। ਪਹਿਲਾਂ, ਨਿਯਮਾਂ ਨੂੰ ਤੋੜਨ ‘ਤੇ ਦੁਕਾਨਦਾਰ ‘ਤੇ ਜੁਰਮਾਨਾ 25 ਤੋਂ 100 ਰੁਪਏ ਸੀ। ਹੁਣ ਜੁਰਮਾਨੇ ਦੀ ਰਕਮ ਸੌ ਤੋਂ ਵਧਾ ਕੇ 30 ਹਜ਼ਾਰ ਕਰ ਦਿੱਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਲੋਕਾਂ ਨੂੰ ਇਸ ਦਾ ਫਾਇਦਾ ਹੋਵੇਗਾ।”
ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਕਿਹਾ ਕਿ ਓਵਰਟਾਈਮ ਦੀ ਸੀਮਾ ਤਿੰਨ ਮਹੀਨਿਆਂ ਵਿੱਚ 50 ਘੰਟੇ ਸੀ। ਹੁਣ ਇਸਨੂੰ ਵਧਾ ਕੇ 144 ਘੰਟੇ ਕਰ ਦਿੱਤਾ ਗਿਆ ਹੈ। ਜੇਕਰ ਕੋਈ ਇੱਕ ਦਿਨ ਵਿੱਚ 9 ਘੰਟੇ ਤੋਂ ਵੱਧ ਅਤੇ ਹਫ਼ਤੇ ਵਿੱਚ 48 ਘੰਟਿਆਂ ਤੋਂ ਵੱਧ ਕੰਮ ਕਰਦਾ ਹੈ, ਤਾਂ ਉਸਨੂੰ ਦੁੱਗਣੀ ਦਰ ‘ਤੇ ਓਵਰਟਾਈਮ ਮਿਲੇਗਾ। ਭਾਵੇਂ ਉਸਨੇ ਇੱਕ ਘੰਟਾ ਕੰਮ ਕੀਤਾ ਤਾਂ ਇੱਕ ਘੰਟੇ ਦੇ ਦੁਗੱਣਾ ਪੈਸੇ ਮਿਲਣਗੇ। ਇਸ ਨਾਲ ਉਸਦੀ ਆਮਦਨ ਵਧੇਗੀ। ਕੁੱਲ ਸਮਾਂ 12 ਘੰਟੇ ਤੱਕ ਹੋਵੇਗਾ। ” 

– ਜੁਰਮਾਨੇ ‘ਚ ਵਾਧਾ
ਮੰਤਰੀ ਤਰੁਨਪ੍ਰੀਤ ਸਿੰਘ ਸੌਂਧ ਨੇ ਕਿਹਾ “ਕੰਮ ਦੇ ਘੰਟਿਆਂ ‘ਚ ਬਰੇਕ ਨੂੰ ਵੀ 9 ਘੰਟਿਆਂ ਵਿੱਚ ਸ਼ਾਮਲ ਕੀਤਾ ਜਾਵੇਗਾ। ਇਸ ਦੇ ਨਾਲ ਹੀ, ਕੋਈ ਵੀ ਦੁਕਾਨਦਾਰ ਉਲੰਘਣਾ ਕਰਦਾ ਹੈ ਤਾਂ ਉਸਨੂੰ ਹੁਣ ALC (ਸਹਾਇਕ ਕਿਰਤ ਕਮਿਸ਼ਨਰ) ਪੱਧਰ ‘ਤੇ, ਅਸੀਂ ਸੂਚਿਤ ਕਰਾਂਗੇ ਕਿ ਕਿਸ ਉਲੰਘਣਾ ਲਈ ਕਿੰਨੀ ਫੀਸ ਹੈ? ਅਤੇ ਵਿਅਕਤੀ ਮੌਕੇ ‘ਤੇ ਹੀ ਆਪਣਾ ਭੁਗਤਾਨ ਕਰ ਸਕੇਗਾ। ਇਸ ਲਈ ਇੱਕ ਪੋਰਟਲ ਦਾ ਵੀ ਪ੍ਰਬੰਧ ਕੀਤਾ ਜਾ ਰਿਹਾ ਹੈ। ਇਸ ਪਾਲਿਸੀ ਵਿੱਚ ਪਹਿਲਾਂ ਅਦਾਲਤ ਵਿੱਚ ਜਾ ਕੇ ਉਲੰਘਣਾ ਲਈ ਚਲਾਨ ਦਾ ਭੁਗਤਾਨ ਕਰਨਾ ਪੈਂਦਾ ਸੀ। ਹੁਣ ਅਦਾਲਤ ਦੀ ਵਿਵਸਥਾ ਖਤਮ ਕਰ ਦਿੱਤੀ ਗਈ ਹੈ।”
– 24 ਘੰਟਿਆਂ ਵਿੱਚ ਪ੍ਰਵਾਨਗੀ ਦਿੱਤੀ ਜਾਵੇਗੀ
ਦੁਕਾਨਦਾਰਾਂ ਨੂੰ ਰਜਿਸਟ੍ਰੇਸ਼ਨ ਲਈ 24 ਘੰਟਿਆਂ ਦੇ ਅੰਦਰ ਪੋਰਟਲ ਵਿੱਚ ਪ੍ਰਵਾਨਗੀ ਮਿਲ ਜਾਵੇਗੀ। ਜੇਕਰ ਪ੍ਰਵਾਨਗੀ ਨਹੀਂ ਮਿਲਦੀ ਹੈ, ਤਾਂ ਇਹ ਮੰਨਿਆ ਜਾਵੇਗਾ ਕਿ ਉਨ੍ਹਾਂ ਨੂੰ ਪ੍ਰਵਾਨਗੀ ਮਿਲ ਗਈ ਹੈ। ਗਲਤੀ ਨੂੰ ਸੁਧਾਰਨ ਦਾ ਵੀ ਮੌਕਾ ਹੋਵੇਗਾ। ਇੰਸਪੈਕਟਰ ਤਿੰਨ ਮਹੀਨਿਆਂ ਵਿੱਚ ਇੱਕ ਵਾਰ ਚੈਕਿੰਗ ਕਰ ਸਕਦਾ ਹੈ। ਲੋਕਾਂ ਨੂੰ ਇਸਦਾ ਲਾਭ ਹੋਵੇਗਾ। ਇਸ ਦੇ ਨਾਲ ਹੀ, ਸਾਰੇ ਕਰਮਚਾਰੀਆਂ ਨੂੰ ਸਰਕਾਰੀ ਸਹੂਲਤਾਂ ਮਿਲਣਗੀਆਂ।
– ਦੁਕਾਨ ਤੋਂ ਬੈਂਕ ਤੱਕ ਦੇ ਲਾਭ
ਨਵਾਂ ਨਿਯਮ ਸਾਰੀਆਂ ਦੁਕਾਨਾਂ, ਸੇਲਜ਼ ਡਿਪੂ, ਸਟੋਰ ਰੂਮ, ਗੋਦਾਮ, ਦਫਤਰ, ਬੈਂਕ, ਗੋਦਾਮ, ਰੈਸਟੋਰੈਂਟ, ਮਨੋਰੰਜਨ ਸਥਾਨ, ਮਕੈਨੀਕਲ ਵਰਕਸ਼ਾਪਾਂ ਅਤੇ ਕਾਰ ਮਕੈਨੀਕਲ ਦੁਕਾਨਦਾਰਾਂ ‘ਤੇ ਲਾਗੂ ਹੋਵੇਗਾ। ਜੇਕਰ ਇਹਨਾਂ ਵਿੱਚੋਂ ਕੋਈ ਵੀ ਜਗ੍ਹਾ ਉਲੰਘਣਾ ਕਰਦੀ ਹੈ, ਤਾਂ ਇੰਸਪੈਕਟਰ ਤਿੰਨ ਮਹੀਨਿਆਂ ਵਿੱਚ ਇੱਕ ਵਾਰ ਜਾਂਚ ਕਰੇਗਾ। ਜੇਕਰ ਇਹ ਸਹੀ ਪਾਇਆ ਜਾਂਦਾ ਹੈ, ਤਾਂ ਇਸਨੂੰ ਠੀਕ ਕੀਤਾ ਜਾਵੇਗਾ।