– ਖ਼ੁਦ ਨੂੰ ਦੱਸਿਆ ਸਿਸੋਦੀਆ ਦਾ ਪੀ.ਏ., ਹਰਿਆਣਾ ਦਾ ਰਹਿਣ ਵਾਲਾ ਹੈ ਮੁਲਜ਼ਮ
ਪਟਿਆਲਾ, 9 ਜੁਲਾਈ (ਰਵਿੰਦਰ ਸ਼ਰਮਾ) : ਪਟਿਆਲਾ ਪੁਲਿਸ ਨੇ ਆਮ ਆਦਮੀ ਪਾਰਟੀ ਦੇ ਇੰਚਾਰਜ ਅਤੇ ਦਿੱਲੀ ਦੇ ਸਾਬਕਾ ਡਿਪਟੀ ਸੀ.ਐੱਮ. ਮਨੀਸ਼ ਸਿਸੋਦੀਆ ਦਾ ਪੁਰਾਣਾ ਫੋਨ ਨੰਬਰ ਐਕਟਿਵ ਕਰਕੇ ਠੱਗੀ ਮਾਰਨ ਵਾਲੇ ਸ਼ਾਤਿਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਉਹ ਖੁਦ ਨੂੰ ਸਿਸੋਦੀਆ ਦਾ ਪੀ.ਏ. ਦੱਸਦਾ ਸੀ ਅਤੇ ਨੇਤਾਵਾਂ, ਮੰਤਰੀਆਂ ਤੇ ਅਧਿਕਾਰੀਆਂ ਤੋਂ ਪੈਸੇ ਮੰਗਦਾ ਸੀ। ਮੁਲਜ਼ਮ ਦੀ ਪਛਾਣ ਜੈ ਕ੍ਰਿਸ਼ਨ ਭਾਰਦਵਾਜ ਪਿੰਡ ਧਾਰੂਹੇੜਾ, ਰੇਵਾੜੀ, ਹਰਿਆਣਾ ਵਜੋਂ ਹੋਈ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਇਹ ਇੱਕ ਬਹੁਤ ਵੱਡਾ ਸਾਈਬਰ ਫਰਾਡ ਗਿਰੋਹ ਹੈ।
ਪੁਲਿਸ ਮੁਤਾਬਕ, ਜੂਨ ਮਹੀਨੇ ਵਿੱਚ ਜਾਅਲੀ ਤਰੀਕੇ ਨਾਲ ਸ਼ਾਤਿਰ ਅਪਰਾਧੀਆਂ ਦੀ ਜ਼ਮਾਨਤ ਦੇਣ ਨਾਲ ਜੁੜਿਆ ਇੱਕ ਕੇਸ ਸਾਹਮਣੇ ਆਇਆ ਸੀ। ਜਦੋਂ ਇਸ ਮਾਮਲੇ ਦੀ ਜਾਂਚ ਅੱਗੇ ਵਧੀ ਤਾਂ ਪਤਾ ਲੱਗਾ ਕਿ ਇਹ ਲੋਕ ਰੈਵੇਨਿਊ ਡਿਪਾਰਟਮੈਂਟ ਦੇ ਜਾਅਲੀ ਦਸਤਾਵੇਜ਼ ਤਿਆਰ ਕਰਕੇ ਠੱਗੀ ਕਰਦੇ ਸਨ। ਇਨ੍ਹਾਂ ਦਾ ਮਾਸਟਰਮਾਈਂਡ ਜੈ ਕ੍ਰਿਸ਼ਨ ਹੈ। ਜਦੋਂ ਉਸਨੂੰ ਗ੍ਰਿਫਤਾਰ ਕੀਤਾ ਗਿਆ ਤਾਂ ਉਸ ਕੋਲੋਂ ਪੰਜ-ਛੇ ਮੋਬਾਈਲ ਮਿਲੇ।
ਇਨ੍ਹਾਂ ਨੂੰ ਫੋਰੈਂਸਿਕ ਜਾਂਚ ਲਈ ਭੇਜਿਆ ਗਿਆ ਤਾਂ ਇੱਕ ਮੋਬਾਈਲ ਨੰਬਰ ਬਰਾਮਦ ਹੋਇਆ, ਜੋ ਕਿ ਮਨੀਸ਼ ਸਿਸੋਦੀਆ ਦਾ ਪੁਰਾਣਾ ਨੰਬਰ ਸੀ। ਇਹ ਨੰਬਰ ਉਸਨੇ ਆਪਣੇ ਸੋਰਸ ਰਾਹੀਂ ਕੰਪਨੀ ਤੋਂ ਹਾਸਲ ਕਰ ਲਿਆ ਸੀ। ਮੁਲਜ਼ਮ ਨੂੰ ਪਤਾ ਸੀ ਕਿ ਇਸਨੂੰ ਸਿਸੋਦੀਆ ਵਰਤਦੇ ਸਨ। ਨੰਬਰ ਹਾਸਲ ਕਰਨ ਤੋਂ ਬਾਅਦ ਉਸਨੇ ਪੰਜਾਬ ਦੇ ਕਈ ਲੋਕਾਂ ਤੋਂ ਠੱਗੀ ਕਰਨ ਦੀ ਕੋਸ਼ਿਸ਼ ਕੀਤੀ। ਇਸ ਵਿੱਚ ਮੰਤਰੀ ਤੇ ਅਫਸਰ ਤੱਕ ਸ਼ਾਮਲ ਹਨ। ਇਸ ਦੀ ਚੈਟ ਤੱਕ ਪੁਲਿਸ ਕੋਲ ਹੈ।
ਇਸ ਨੰਬਰ ਤੋਂ ਉਹ ਮਨੀਸ਼ ਸਿਸੋਦੀਆ ਦਾ ਪੀ.ਏ. ਬਣ ਕੇ ਕਾਲਾਂ ਕਰਦਾ ਸੀ। ਨਾਲ ਹੀ ਲੋਕਾਂ ਨੂੰ ਕੰਮ ਕਰਵਾਉਣ ਦਾ ਵਾਅਦਾ ਕਰਕੇ ਪੈਸੇ ਮੰਗਦਾ ਸੀ। ਪੁੱਛਗਿੱਛ ਵਿੱਚ ਉਸਨੇ ਮੰਨਿਆ ਹੈ ਕਿ ਕਈ ਟੈਲੀਕਾਮ ਕੰਪਨੀਆਂ ਦੇ ਮੁਲਾਜ਼ਮਾਂ ਨਾਲ ਉਸਦੇ ਸੰਪਰਕ ਹਨ। ਅਜਿਹੇ ਵਿੱਚ ਹੁਣ ਉਸ ਉੱਤੇ ਇੱਕ ਹੋਰ ਕੇਸ ਦਰਜ ਕੀਤਾ ਗਿਆ ਹੈ।
ਪੁਲਿਸ ਮੁਤਾਬਕ ਇਹ ਬਹੁਤ ਵੱਡਾ ਸਾਈਬਰ ਫਰਾਡ ਹੈ। ਮੁਲਜ਼ਮ ਪਹਿਲਾਂ ਵੀ CBI ਅਫਸਰ ਬਣ ਕੇ ਠੱਗੀ ਕਰ ਚੁੱਕਾ ਹੈ। ਇਹ ਠੱਗੀ ਉਸਨੇ ਇੱਕ ਔਰਤ ਨਾਲ ਕੀਤੀ ਸੀ। ਇਸ ਮਾਮਲੇ ਵਿੱਚ ਉਸਨੂੰ ਤਿੰਨ ਸਾਲ ਦੀ ਸਜ਼ਾ ਹੋਈ ਸੀ। ਹਾਲਾਂਕਿ ਇਹ ਆਪਣੀ ਤਰ੍ਹਾਂ ਦਾ ਨਵਾਂ ਫਰਾਡ ਹੈ। ਇਸ ਤੋਂ ਪਹਿਲਾਂ ਮੋਹਾਲੀ ਵਿੱਚ ਕਾਂਗਰਸ ਦੇ ਸੀਨੀਅਰ ਨੇਤਾ ਰਾਹੁਲ ਗਾਂਧੀ ਦਾ ਪੀ.ਏ. ਬਣਾ ਕੇ ਠੱਗੀ ਦਾ ਮਾਮਲਾ ਸਾਹਮਣੇ ਆਇਆ ਸੀ। ਉਸ ਵਿਅਕਤੀ ਨੂੰ ਵੀ ਪੁਲਿਸ ਨੇ ਕਾਬੂ ਕੀਤਾ ਸੀ। ਉਹ ਲੋਕਾਂ ਨੂੰ ਪੰਜਾਬ ਪੁਲਿਸ ਵਿੱਚ ਨੌਕਰੀ ਦਿਵਾਉਣ ਦੇ ਨਾਮ ‘ਤੇ ਠੱਗਦਾ ਸੀ।
