ਪੰਜਾਬੀ ਅਦਾਕਾਰ ਤੇ ਗਾਇਕ ਕਰਮਜੀਤ ਅਨਮੋਲ ਦੇ ਗਨਮੈਨ ਤੋਂ ਲੁੱਟਖੋਹ

ਖੰਨਾ, 27 ਫਰਵਰੀ (ਰਵਿੰਦਰ ਸ਼ਰਮਾ) : ਪ੍ਰਸਿੱਧ ਪੰਜਾਬੀ ਕਲਾਕਾਰ ਕਰਮਜੀਤ ਅਨਮੋਲ ਦੇ ਗਨਮੈਨ ਸਰਬਪ੍ਰੀਤ ਸਿੰਘ ਨਾਲ ਲੁੱਟਪਾਟ ਹੋਈ ਹੈ। ਲਾਂਡਰਾ ਦੇ ਮਜਾਤ ਇਲਾਕੇ ਦੇ ਨੇੜੇ ਲੁੱਟੇਰਿਆਂ ਨੇ ਸਰਬਪ੍ਰੀਤ ਦੀ ਗੱਡੀ ਨੂੰ ਘੇਰ ਲਿਆ। ਉਨ੍ਹਾਂ ਨੇ ਪਿਸਤੌਲ ਦੀ ਨੋਕ ‘ਤੇ ਸਰਬਪ੍ਰੀਤ ਨੂੰ ਅਗਵਾ ਕਰ ਲਿਆ ਅਤੇ ਉਨ੍ਹਾਂ ਦੀ ਗੱਡੀ ਵੀ ਖੋਹ ਲਈ।

ਸਰਬਪ੍ਰੀਤ ਚੰਡੀਗੜ੍ ਤੋਂ ਆਪਣੀ ਆਈ-20 ਕਾਰ ਵਿੱਚ ਆਪਣੇ ਪਿੰਡ ਚੰਦੂਮਾਜਰਾ (ਪਟਿਆਲਾ) ਵਾਪਸ ਆ ਰਹੇ ਸਨ। ਰਸਤੇ ਵਿੱਚ ਇੱਕ ਫਾਰਚੂਨਰ ਗੱਡੀ ਨੇ ਉਨ੍ਹਾਂ ਦੀ ਕਾਰ ਨੂੰ ਰੋਕ ਲਿਆ। ਫਾਰਚੂਨਰ ਵਿੱਚੋਂ ਉਤਰੇ ਨੌਜਵਾਨਾਂ ਨੇ ਬੰਦੂਕ ਦੀ ਨੋਕ ‘ਤੇ ਉਨ੍ਹਾਂ ਨੂੰ ਆਪਣੀ ਗੱਡੀ ਵਿੱਚ ਬਿਠਾ ਲਿਆ। ਇੱਕ ਬਦਮਾਸ਼ ਉਨ੍ਹਾਂ ਦੀ ਆਈ-20 ਕਾਰ ਲੈ ਕੇ ਫਰਾਰ ਹੋ ਗਿਆ।

ਲੁੱਟੇਰੇ ਸਰਬਪ੍ਰੀਤ ਨੂੰ ਸਰਹਿੰਦ ਲੈ ਗਏ। ਉੱਥੇ ਉਨ੍ਹਾਂ ਨੇ ਉਨ੍ਹਾਂ ਦੇ ਏਟੀਐਮ ਤੋਂ ਲਗਭਗ 9500 ਰੁਪਏ ਕਢਵਾ ਲਏ। ਇਸ ਤੋਂ ਬਾਅਦ ਲੁਟੇਰੇ ਉਨ੍ਹਾਂ ਨੂੰ ਖੰਨਾ ਵਿੱਚ ਜ਼ਖ਼ਮੀ ਹਾਲਾਤ ਵਿੱਚ ਛੱਡ ਕੇ ਫਰਾਰ ਹੋ ਗਏ। ਸਰਬਪ੍ਰੀਤ ਨੂੰ ਸਿਵਲ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ। ਪੁਲਿਸ ਨੇ ਸਰਬਪ੍ਰੀਤ ਦੀ ਕਾਰ ਜੋੜੇਪੁੱਲ ਦੇ ਨੇੜੇ ਤੋਂ ਬਰਾਮਦ ਕਰ ਲਈ ਹੈ। ਡੀਐਸਪੀ ਖੰਨਾ ਅਮ੍ਰਿਤਪਾਲ ਸਿੰਘ ਭਾਟੀ ਦੇ ਅਨੁਸਾਰ ਇਹ ਵਾਰਦਾਤ ਰਾਜਪੁਰਾ ਇਲਾਕੇ ਵਿੱਚ ਹੋਈ ਹੈ। ਮਾਮਲੇ ਦੀ ਜਾਂਚ ਰਾਜਪੁਰਾ ਪੁਲਿਸ ਕਰੇਗੀ।