ਪਾਕਿਸਤਾਨ ਲਈ ਜਾਸੂਸੀ : ਲਗਜ਼ਰੀ ਜੀਵਨ ਸ਼ੈਲੀ ਦੀ ਸ਼ੌਕੀਨ ਯੂਟਿਊਬਰ ਜਯੋਤੀ ਮਲਹੋਤਰਾ 3 ਵਾਰ ਜਾ ਚੁੱਕੀ ਹੈ ਪਾਕਿ

ਚੰਡੀਗੜ੍ਹ, 18 ਮਈ (ਰਵਿੰਦਰ ਸ਼ਰਮਾ) :  ਹਰਿਆਣਾ ਪੁਲਿਸ ਅਤੇ ਖੁਫੀਆ ਏਜੰਸੀਆਂ ਦੇ ਸਾਂਝੇ ਆਪ੍ਰੇਸ਼ਨ ਜਿੱਥੇ ਕੁਝ ਸਮਾਂ ਪਹਿਲਾਂ ਪਾਣੀਪਤ ਤੋਂ ਨੋਮਾਨ ਇਲਾਹੀ, ਕੈਥਲ ਤੋਂ ਦੇਵੇਂਦਰ ਢਿੱਲੋਂ ਅਤੇ ਨੂੰਹ ਤੋਂ ਅਰਮਾਨ ਨੂੰ ਜਾਸੂਸੀ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕਰਨ ਤੋਂ ਬਾਅਦ ਜਦੋਂ ਹੁਣ ਹਿਸਾਰ ਦੀ ਯੂਟਿਊਬਰ ਜਯੋਤੀ ਮਲਹੋਤਰਾ ਦਾ ਭੇਦ ਖੁੱਲ੍ਹਿਆ ਤਾਂ ਪੁਲਿਸ ਨੇ ਉਸ ਨੂੰ ਵੀ ਗ੍ਰਿਫ਼ਤਾਰ ਕਰਦਿਆਂ ਕਈ ਅਹਿਮ ਖੁਲਾਸੇ ਕੀਤੇ ਹਨ। ਹੁਣ ਪੁਲਿਸ ਸਾਰੇ ਮੁਲਜ਼ਮਾਂ ਨੂੰ ਆਹਮੋ-ਸਾਹਮਣੇ ਬਿਠਾ ਕੇ ਪੁੱਛਗਿੱਛ ਕਰਨ ਦੀ ਤਿਆਰੀ ਕਰ ਰਹੀ ਹੈ।

– ਕੌਣ ਹੈ ਜਯੋਤੀ ਮਲਹੋਤਰਾ

33 ਸਾਲਾ ਯੂਟਿਊਬਰ ਜਯੋਤੀ ਮਲਹੋਤਰਾ ’ਤੇ ਦੋਸ਼ ਹੈ ਕਿ ਉਸਨੇ ਟਰੈਵਲ ਬਲੌਗਿੰਗ ਦੀ ਓਟ ਵਿੱਚ ਦੇਸ਼ ਦੀ ਗੁਪਤ ਜਾਣਕਾਰੀ ਪਾਕਿਸਤਾਨ ਦੀਆਂ ਖੁਫੀਆ ਏਜੰਸੀਆਂ ਤੱਕ ਪਹੁੰਚਾਈ। ਗ੍ਰਿਫ਼ਤਾਰੀ ਤੋਂ ਬਾਅਦ ਹਿਸਾਰ ਦੀ ਅਦਾਲਤ ਨੇ ਜਯੋਤੀ ਨੂੰ ਪੰਜ ਦਿਨ ਦੇ ਪੁਲਿਸ ਰਿਮਾਂਡ ‘ਤੇ ਭੇਜ ਦਿੱਤਾ ਹੈ। ‘ਟਰੈਵਲ ਵਿਦ ਜੋ’ ਨਾਂ ਦਾ ਯੂਟਿਊਬ ਚੈਨਲ ਚਲਾਉਣ ਵਾਲੀ ਜਯੋਤੀ ਦੇ 3.80 ਲੱਖ ਤੋਂ ਵੱਧ ਸਬਸਕ੍ਰਾਈਬਰ ਅਤੇ ਇੰਸਟਾਗ੍ਰਾਮ ‘ਤੇ ਇੱਕ ਲੱਖ ਤੋਂ ਵੱਧ ਫਾਲੋਅਰਜ਼ ਹਨ। ਜਯੋਤੀ ਪਿਛਲੇ ਦੋ ਸਾਲਾਂ ਵਿੱਚ ਤਿੰਨ ਵਾਰ ਪਾਕਿਸਤਾਨ ਜਾ ਚੁੱਕੀ ਹੈ ਅਤੇ ਚੌਥੀ ਵਾਰ ਜਾਣ ਦੀ ਤਿਆਰੀ ਵਿੱਚ ਸੀ। ਉਸਨੂੰ ਸ਼ਾਨੋ-ਸ਼ੌਕਤ ਵਾਲੀ ਜ਼ਿੰਦਗੀ ਪਸੰਦ ਸੀ।

– ਇੰਝ ਖੁੱਲ੍ਹਿਆ ਭੇਦ
ਪਾਕਿਸਤਾਨ ਦੀਆਂ ਜਿੰਨ੍ਹਾਂ ਥਾਵਾਂ ’ਤੇ ਆਮ ਭਾਰਤੀਆਂ ਲਈ ਜਾਣਾ ਜਿੱਥੇ ਨਾਮੁਮਕਿਨ ਹੈ, ਉੱਥੇ ਜਯੋਤੀ ਦਾ ਆਉਣਾ ਜਾਣਾ ਬਹੁਤ ਅਸਾਨ ਸੀ।  ਇਸ ਤੋਂ ਇਲਾਵਾ ਲਾਹੌਰ ਵਿੱਚ ਪੁਲਿਸ ਵਾਲੇ ਉਸਨੂੰ ਰੇਲਗੱਡੀ ਵਿੱਚ ਚਾਹ ਪਿਲਾਉਂਦੇ ਵੀ ਦੇਖੇ ਗਏ। ਇਹਨਾਂ ਸਾਰੀਆਂ ਗੱਲਾਂ ਨੇ ਭਾਰਤੀ ਸੁਰੱਖਿਆ ਏਜੰਸੀਆਂ ਦਾ ਧਿਆਨ ਖਿੱਚਿਆ। ਜਯੋਤੀ ‘ਤੇ ਦੋਸ਼ ਹੈ ਕਿ ਉਸਨੇ ਪਾਕਿਸਤਾਨੀ ਖੁਫੀਆ ਏਜੰਟਾਂ ਨੂੰ ਫੌਜੀ ਟਿਕਾਣਿਆਂ ਅਤੇ ਹਵਾਈ ਪੱਟੀ ਨਾਲ ਸਬੰਧਤ ਜਾਣਕਾਰੀ ਦਿੱਤੀ।

– ਕਦੋਂ ਅਤੇ ਕਿਵੇਂ ਬਣੀ ਪਾਕਿਸਤਾਨੀ ਖੁਫੀਆ ਏਜੰਸੀ ਦੀ ਮੋਹਰਾ?
ਇੱਕ ਰਿਪੋਰਟ ਦੇ ਅਨੁਸਾਰ, ਜਯੋਤੀ 2023 ਵਿੱਚ ਪਾਕਿਸਤਾਨੀ ਹਾਈ ਕਮਿਸ਼ਨ ਵਿੱਚ ਕੰਮ ਕਰਦੇ ਅਹਿਸਾਨ ਉਰ ਰਹੀਮ ਉਰਫ ਦਾਨਿਸ਼ ਨੂੰ ਮਿਲੀ ਸੀ। ਦਾਨਿਸ਼ ਨੇ ਉਸਨੂੰ ਵੀਜ਼ਾ ਦਿਵਾਉਣ ਦਾ ਭਰੋਸਾ ਦਿੱਤਾ ਅਤੇ ਦੋਵਾਂ ਵਿਚਕਾਰ ਸੰਪਰਕ ਵਧਿਆ। ਪਾਕਿਸਤਾਨ ਵਿੱਚ ਜਯੋਤੀ ਨੂੰ ਅਲੀ ਅਹਿਵਾਨ, ਸ਼ਾਕਿਰ ਅਤੇ ਰਾਣਾ ਸ਼ਹਿਬਾਜ਼ ਵਰਗੇ ਖੁਫੀਆ ਏਜੰਟਾਂ ਨਾਲ ਮਿਲਵਾਇਆ ਗਿਆ। ਇਸੇ ਦੌਰਾਨ ਉਹ ਜਾਸੂਸੀ ਨੈੱਟਵਰਕ ਦਾ ਹਿੱਸਾ ਬਣ ਗਈ।

ਜਯੋਤੀ ਨੇ ਵਟਸਐਪ, ਟੈਲੀਗ੍ਰਾਮ ਅਤੇ ਸਨੈਪਚੈਟ ਵਰਗੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਰਾਹੀਂ ਸੰਵੇਦਨਸ਼ੀਲ ਜਾਣਕਾਰੀ ਪਾਕਿਸਤਾਨ ਤੱਕ ਪਹੁੰਚਾਈ। ਉਸਨੇ ਏਜੰਟ ਸ਼ਾਕਿਰ ਦਾ ਨਾਮ ‘ਜੱਟ ਰੰਧਾਵਾ’ ਦੇ ਨਾਂ ਨਾਲ ਸੇਵ ਕੀਤਾ ਸੀ ਤਾਂ ਜੋ ਕਿਸੇ ਨੂੰ ਸ਼ੱਕ ਨਾ ਹੋਵੇ। 24 ਮਾਰਚ, 2024 ਨੂੰ ਦਿੱਲੀ ਸਥਿਤ ਪਾਕਿਸਤਾਨੀ ਦੂਤਾਵਾਸ ਵਿੱਚ ਹੋਈ ਇੱਕ ਪਾਰਟੀ ਵਿੱਚ ਜਯੋਤੀ ਨੂੰ ਵਿਸ਼ੇਸ਼ ਮਹਿਮਾਨ ਵਜੋਂ ਬੁਲਾਇਆ ਗਿਆ ਸੀ। ਇਸ ਪਾਰਟੀ ਦਾ ਵੀਡੀਓ ਉਸਦੇ ਚੈਨਲ ‘ਤੇ ਵੀ ਹੈ। ਇਹ ਵੀ ਕਿਹਾ ਜਾਂਦਾ ਹੈ ਕਿ ਉਹ ਪਾਕਿਸਤਾਨੀ ਅਧਿਕਾਰੀਆਂ ਨਾਲ ਬਾਲੀ ਦੀ ਯਾਤਰਾ ‘ਤੇ ਵੀ ਗਈ ਸੀ। ਜਯੋਤੀ ਕੋਲੋਂ ਕਈ ਤਕਨੀਕੀ ਉਪਕਰਣ ਵੀ ਬਰਾਮਦ ਕੀਤੇ ਗਏ ਹਨ, ਜਿਨ੍ਹਾਂ ਦੀ ਜਾਂਚ ਜਾਰੀ ਹੈ।